http://static.elcorreo.com/www/menu/img/zurekin-desktop.jpg

Sarrionandiaren obran sakontzeko ibilaldia

Sarrionandiaren obran sakontzeko ibilaldia

Iurretan jaiotako idazle ospetsuaren hogei esaldi bere herrian zehar sakabanatuak daude Udalak egin nahi izan dion omenaldia dela eta

VIRGINIA ENEBRAL

Arteak ezkurrak ematen ditu. Batzuk, parentesi artean bizi gara. Harriak ditugu, baina ez dugu herririk. Inor gutxik ezagutuko du aurreko esaldien egiletza, baina 'Lagun izoztua', 'Atabala eta euria', 'Hitzen ondoeza' eta, batez ere, 'Moroak gara behelaino artean' aipatzen bada, ziur aski batek baino gehiagok idazlearen izena asmatuko lukeela. Iurretan jaio zen Joseba Sarrionandiari omenaldi bat egitea erabaki du Udalak. «Herriaren izena munduan kokatu du», azpimarratu zuen Iñaki Totorikaguena alkateak instalazio poetikoaren aurkezpenean. Kuban bizi den idazlearen hogei esaldi, poema eta testuk zipriztintzen dituzte kaleak orain: jaio zen etxea; bere amak Garaizarren duen baserria; Goiuria, bere aitaren auzoa; herriko plaza; Ibaizabal ibaiak Durango banatu eta berriro ere batzen duen zubiak... Orain dela 59 urte jaiotako literatur sortzaile famatuarentzat zenbait toki azpimarragarri baino ez dira, baina horregatik, hain zuzen ere, bere ibilbidearen hainbat tanta uzteko aukeratuak izan dira.

«Lehenik eta behin esanguratsuak izan litezkeen kokapenak identifikatu genituen», azaldu zuen Peru Magdalenak, ekimenaren antolatzaileak. Leku horiek zehaztu ondoren, «zerikusia» zuten perpausak bilatu zituzten. «Ahalik eta hautaketa anitzena egiten saiatu ginen, argitalpen guztietatik esaldiak hartu baititugu. Estiloari dagokionez aberatsa ere bada: esaldi batzuei umorea darie, badaude lirikoak direnak, erabat ospetsuak egin direnak, baita irakurleentzat ezezagunak direnak ere. Adierazpenak sartzea erabaki dugu eta kritikaz jositakoak ez dira falta».

Jakinmina piztu

Herriko txokoetan aurki daitezkeen esaerek kokapenarekin harremana izateaz gain, «jendearen jakinmina piztea daukate helburu», adierazi zuen Magdalenak, Pello Salaberriarekin batera Joseba Sarrionandiari buruzko 'Hemen eta han' dokumentala zuzendu duenak. Elkarlanean burututako lana azaroaren 30ean, Iurretako Ibarretxe Kultur Etxean, eta abenduaren 9an, Durangoko Azokan, ikusi ahal izango da. «Eskola eta institututik liburutegirantzako bidean 'Irakurketa bakoitza berridazketa bat da' irakur daiteke. Alde batetik, espazio hauen eginkizunarekin lotura estua duen esaldia da, eta bestetik, pentsarazi egiten duen esana ere».

Guztira hogei errotulu dira eta hizkuntza ezberdinetan idatzirik daude: euskera, gaztelania, ingelesa, frantsesa, arabiera, errumaniera edota berberera. «Herriko errealitate soziodemografikoa aztertu dugu, bertan bizi diren guztiek testuetara heltzeko aukera izan dezaten», argitu zuen Totorikaguenak. «Joseba Sarrionaindia idazle jasoa da askorentzat, kalitate literario ikaragarria duena, eta agian horrexegatik, askori ulergai suerta lekioke, niri esaterako», onartu zuen alkateak. Omenaldia, beraz, «Sarrionandiaren etiketak gainditzeko bide bat da, eta aldi berean, idazlea bere osotasunean ezagutzeko aukera ere bai, egilearen obra zabala baita; izan ere, genero guztietan jardun du eta makina bat hizkuntzetara izan da itzulia».

Temas

Euskera

Contenido Patrocinado

Fotos

Vídeos