Ramiro González diputatu nagusiak Añanako Gatz Haranari emandako Munduko Nekazaritza Ondarearen saria jaso du

Ramiro Gonzálezek, Arabako diputatu nagusiak, Añanako Gatz Harana Munduko Nekazaritza Ondarearen Sistema Garrantzitsuen Zerrendan sartu dutela egiaztatzen duen saria jaso zuen atzo Erroman. Dagoeneko 2017. urtearen amaieran jakinarazi zuten katalogo horretan sartuko zutela, eta Arabako Foru Aldundiak jakinarazpen batean gogoratu duenez, hori lortzen duen Europako lehen herria da.

Jose Graziano Da Silvak, Elikadurarako eta Nekazaritzarako Nazio Batuen Erakundeko (FAO) presidenteak eman zion saria diputatu nagusiari. Honek, sari hori «oso garrantzitsua» dela esan zuen, eta Gatz Haraneko ondare «ikusgarria» mundu osoan ezagutzera ematen lagunduko duela.

Gonzalez diputatu nagusiak azaldu zuen Munduko Nekazaritza Ondarearen Sistema Garrantzitsuen zerrendan sartzearen ondorioz, Arabako toki hori «altxor naturalen munduko mapan» sartuko dela, eta horrek, «haranaren eta eskualde osoaren garapen handiagoa» ekarriko duela.

Saria Munduko Nekazaritza Ondarearen Sistema Garrantzitsuen (NOSG) Nazioarteko Foroaren barruan banatu zuten. Foro horretan, zenbait gobernutako kideak, NOSGeko ordezkariak, herrialdeetako ordezkariak, nazioarteko adituak eta FAOko eta nazioarteko beste erakunde batzuetako ofizial teknikoak biltzen dira.

Diputatu nagusiarekin batera Nekazaritzako diputatu Eduardo Aguinaco, Gatz Haraneko kudeatzaile Andoni Erkiaga eta Añanako Gatz Haraneko udaleko ordezkariak ere izan ziren.

Arabako Aldundiak adierazi zuen FAOren sari horrek Gatz Haraneko Fundazioak 2016ean hasi zuen «lana nabarmendu» duela. Hasiera batean hautagaitza prestatu zuten eta foru teknikariak Txinan izan ziren txostena prestatzen. Gero, Erroman dokumentua aurkeztu zieten FAOko ordezkariei. Gatz Harana Munduko Nekazaritza Ondarearen Sistema Garrantzitsuen zerrendan sartuko zutela jakin zenetik, FAOko zenbait kide etorri dira bisitatzera.

• Temas
• Ramiro González
• euskera