http://static.elcorreo.com/www/menu/img/zurekin-desktop.jpg

«Ez dut nire bideoak ikustea atsegin, lotsatu egiten naiz»

Iban Garcia, youtuberra.

Sare sozialek indar handia duten garai honetan Iban Garcia youtuber eta telebistako kolaboratzaile azkoitiarrarekin solasean aritu gara

IZASKUN MOYANO

Jaunartzea egin zuenean oparitu zioten bere lehendabiziko kamera eta ordutik hona ez dio honen aurrean ateratzeari utzi. Txikitatik telebista eta irratiaren munduak erakarrita, betidanik «saltseatu» omen du Iban Garciak grabatzeko ekipoarekin. Egun batean ordea, 11 urte soilik zituela Youtube sare soziala deskubritu eta bideoak egiten hasi zen. Bere kabuz editatzen ikasi eta egun, zazpi urte beranduago, ia 56,000 jarraitzaile ditu. «Igo nuen lehenengo bideoan nire kalea grabatu nuen», gogoratu du azkoitiarrak.

Hasierako hiru edo lau urteetan, beste youtuber batzuei jarraiki berak ere gauza bera egitea erabaki zuen. Lehenengo hilabeteetan 1000 follower zituen baina urteak aurrera egin zuten heinean kopuru horrek aparra bezala egin du gora. «Oso polita da jendeak horrenbeste denbora egiten pasatu duzun lana begi onez ikustea», adierazi du Garciak. Hala eta guztiz ere, baditu hater direlakoak ere. Hauen hitzak kritika konstruktibo gisa hartzen ditu gazteak, eta iruzkin gogorrak idazten dizkioten «inbidiatsuei» zuzenean muzin egiten die. Hala eta guztiz ere, 11 urterekin gogorra iruditu zitzaiola onartu du.

Iban Garciak dagoeneko errutina bat jarraitzen du bere Youtubeko katean, @despertavlogs. Izan ere, astean bideo bat grabatu, editatu eta igotzen du. Baina sormen lanari dagokionez, ez du inolako arazorik, ideiak aise bururatzen baitzaizkio. Guztiak gogoratzeko mugikorrean duen lista batean apuntatzen ditu, eta bideoa egiterako orduan handik hartzen ditu. Ez da inolako gidoiez baliatzen, unean burura etortzen zaiona zuzenean grabatzen du. Hala eta guztiz ere, oso perfekzionista omen da Iban. «Lanarekin gustura geratu eta ongi atera arte ez dut bideoa Youtubera igotzen», baieztatu du.

Egun, Euskal Herrian ezaguna den youtuberra da Iban, baina hasieran bere etxean ez zekiten zertan ematen zuen denbora librea bere gelan. «Nire amak bakarrik hitz egiten entzuten ninduen logelan eta telefonozko dei luzeak egiten nituela uste zuen». Baina egun batean, Iban ezagun egiten joan zenean Gaztea Irratian elkarrizketatu zuten. Une horretan hain zuzen ere deskubritu zuen Ibanen familiak bere nortasun digital arrakastatsua. Amak kasualitatez lanean entzun zuen eta arrebak autobusean. Beraz, etxean youtuber izatearen kontua azaldu behar izan zion familiari azkoitiarrak.

Ordutik aurrera, Ibanen ama da bere «fan number one». Honek, bideoen inguruko iritzia ematen dio. «Teknologiaren munduan ez du ideia izpirik ere, Whats App eta listo, baina asko laguntzen dit». Hala ere, amaz gain ere baditu zaleak youtuber azkoitiarrak. Hauetako asko «lotsatiak» direla uste du. Izan ere, Twitter sare sozialean berari urrunetik ateratako argazkiak aurkitzen ditu «lotsa ematen dien ‘paparazziak’» igota. Beraz, Ibanek asko eskertuko luke zaleok berarengana hurbiltzea, bere lana onesten duten seinale.

Asko entzuten da youtuber gehienak beti umore onean daudela, hori baita beraien bideoak erakusten dutena. Baina antza denez ez da horrela izaten. Ibanek adibidez, lehen momentutik bere katea bideratu egin du, azkoitiarrak finko jarraitzen duelako bere xedea. «Nire bideoen bidez positibismoa eta poztasuna transmititu nahi ditut». Beraz, pozik ez dagoen egunean ez du bideorik grabatzen. Youtuben eta errealitatean energiaz beteta dagoen pertsona bera dela aitortu digu. «Bideoetan ez dut pertsonaiarik interpretatzen naiz, ni neu naiz uneoro».

Youtubetik euskal telebistara

«Youtube niretzat erakusleihoa da», esan du Ibaiek. Eta arrazoi guztia du, izan ere, sare sozialetan erdietsi duen arrakastari esker telebistara egin du salto. Azkoitiarrak ETB1eko youtuberren lehiaketan hartu zuen parte eta egun ‘Gure Kasa’ saioan ikus genezake astegun gauetan kolaboratzaile lanetan. Alde handia dagoela aitortu digu, etxean berak egiten baitu lan guztia eta telebistan taldean aritzera ohitu behar dela.

Gauza on asko ekarri dizkio bideoen sare sozialak Garciari. Beste batzuen artean, «honi esker jendearen aurrean hitz egiten ikasi dut», eta hau oso baliogarria izango da berarentzat telebistan publikoa baitute harmailetan eserita. Bestalde, asko izango dira klaseko lagunen aurrean egin beharreko aurkezpenak. Izan ere, azkoitiarra aurten hasi da unibertsitatean bere pasioa den Ikus Entzunezko Komunikazioko ikasketak burutzen. «Oso gustura nago lana eta hobbya uztartzeko abagunea dudalako».

Momentua aprobetxatzen duen horietakoa dela adierazi du Iban Garciak, hori dela eta ez du biharamunean pentsatzen. «Etorkizunak ez dit beldurrik ematen», adierazi du ziur. Duela zazpi urte ez zuen inolaz ere imajinatuko honaino iritsiko zenik, beraz azkoitiarrak egun bizitzen ari den une goxoa dastatzen darrai.

Fotos

Vídeos