http://static.elcorreo.com/www/menu/img/zurekin-desktop.jpg

Neguko jokoetara iristeko kirolarien esfortzua, Euskal Telebistan

Neguko jokoetara iristeko kirolarien esfortzua, Euskal Telebistan

ETB 1 eta ETB2-k erreportaia sorta bat eskainiko dute hurrengo asteetan, non parte hartzaile euskaldunek bizi izan dituzten esperientzia desberdinak islatuko diren

JAN ECHEVARRÍA

Aurtengo Pyeongchangeko Olinpiar eta Paralinpiar Jokoak otsailean ospatuko dira eta, argi dagoenez, lehiaketa horretan parte hartzeko faseak gainditzea ez da batere erraza izan kirolarientzako. Gauzak horrela, txapelketa horietan lehiatuko diren euskal kirolarien esfortzua erakusteko helburuarekin, Euskal Telebistak erreportaia sorta bat eskainiko du hurrengo asteetan, non parte hartzaile euskaldunek joko horietara iristeko bizi izan dituzten esperientzia desberdinak (gogorrak eta politak ere bai) islatuko diren.

'BAT To PyeongChang' saioak urtarrileko lehen asteburutik otsaileko bigarren asteburura eskainiko dira eta Felipe Montoya eta Iñigo Vidondo patinatzaileak, Juan del Campo eta Jon Santacana eskiatzaile alpinoak, Imanol Rojo iraupen eskiatzailea eta Lucas Eguibar snowboardlaria izango ditu protagonista. Bertan, kirolarien ametsak, erronkak eta gainditzeko nahia erakutsiko dira, ikuslea borroka horretan kirolariaren bidelagun izan dadin.

Esan bezala, 'BAT to PyeongChang' saioa astero emitituko da. Audientziak gaztelaniaz ikusteko aukera izango du larunbatetan 13:45etan ETB2n eta euskaraz 'Oreka' programaren barruan igandero ETB1en. Saio bakoitzak 10 minutuko erreportajea eskainiko du eta, horrela, Jokoak hasteko hilabete falta denean, Hego Koreako hirian lehiatzeko sailkapena eskuratzeko borrokatu diren euskal kirolarien istorioa ezagutzeko aukera izango dute ikusleek.

Puntako teknologia

'BAT to PyeongChang' saioaren lehenengo atala asteburu honetan (urtarrilak 6-7) eskainiko da eta jada sailkapena poltsikoan duen Lucas Eguibar snowboardlaria izango du protagonista. Eguibarrek kontatuko du nola bizi dituen bere bigarren Olinpiar Jokoen sailkapen probak, 2017an snowboardcrosseko Munduko azpitxapeldun izan ondoren, bai banakako lehian, bai taldekakoan. Donostiarra 2014ko Sotxiko Jokoetan aritu zen eta diploma bat eskuratu zuen. Oraingoan podiumera igotzea du helburu, 2017ko Munduko txapelketaren ostean zendu zen bere entrenatzaileari domina eskaini ahal izateko.

Korima Filmsek eta Akhonmediak ekoiztuta, Iñigo Asensiok zuzenduta eta Iñigo Erasok errealizatuta, programak irudi zoragarriak eskainiko dituela aurreratu dute arduradunek, ikusentzunezkoetan puntako teknologia erabili dutela gogoratu osteam. Asensiok eta Erasok eskarmentu handia dute telebistan, kirola eta bidaien inguruko gaiak maiz jorratu dituzte eta. Biak izan ziren 'BAT to London' eta 'BAT To Rio' saioen egileak.

Edizio honetan, telebista emankizunaz gain, sare sozialetan ere indarra emango zaio saioari. Hortaz aparte, Basque Teamek arreta berezia eskainiko die atalei bere hedabideetan (Twitter, Facebook, YouTube eta www.basqueteam.eus webgunean). Ez ezazu galdu!

Temas

Euskera

Contenido Patrocinado

Fotos

Vídeos