http://static.elcorreo.com/www/menu/img/zurekin-desktop.jpg

Munduko 150 unibertsitate gazte onenen artean dago EHU

'Times Higher Education' aldizkariak 50 urte baino gutxiago duten kalitate handiko goi-ikastetxeeen zerrendan sartu du Euskal Herriko Unibertsitatea

AMALIA IBARGUTXI

Center for World University Rankings (CWUR) erakundeak egindako unibertsitate sailkapenean 359. postua eman zioten duela hilabete eskas Euskal Herriko Unibertsitateari (EHU). Unibertsitateak ebaluatzen dituen mundu osoko analisi ospetsuenetakoa da CWUR-rena, eta EHUk beste 18.000 unibertsitateren artean lortu du postu hori. Orain, duela mende erdi baino gutxiago sortutako unibertsitate onenak biltzen dituen unibertsitate gazteen rankinean (garai bateko 'Times Higher Education 150 Under Rankings' zena) sartu dute EHU.

Aukeraketarako metodologian parametro nagusitzat ezarri dituzte irakaskuntza, ikerkuntza, izen handiko argitalpenetako aipuen adierazlea, nazioarteko ikuspegia eta ezagutzaren transferentziagatik lortutako baliabideak.

«Mundu mailako unibertsitate gazteak ebaluatzeko erakusle zorrotza da THE Ranking-a», esan du Nekane Balluerka errektoreak albistearen harira. «Gure unibertsitatearen izen ona sendotzeaz gain, nazioartean proiektatzen du bere irudia, agertzen garen beste nazioarteko ranking batzuek egiten duten bezalatsu, hala nola Shanghaiko rankinga. Oso berri positiboa da UPV/EHUrentzat, baina ez dugu triunfalistak izan nahi: hobetzeko aukera dugu eta jakin badakigu hori egin behar dugula. Dena dela, horrelako albisteak norabide onean lan egiteko pizgarriak dira», adierazi du.

Times Higher Education The Times egunkariari atxikitako astekaria da, eta Erresuma Batuko eta nazioarteko goi mailako hezkuntzari buruzko informazioa argitaratzen du eta mundu osoan erabiltzen da sortu berri diren erakunde akademikoak kalifikatzeko. Leku berezian kokatzen du honek EHU, izan ere, lehen aipatutako CWUR rankineko aipamenaz gain, Shanghaiko Rankinean munduko 500 unibertsitate onenen artean ere kokatu izan da azken sei urteotan. Rankinean agertzen diren espainiar estatuko hamaika goi mailako ikasketa zentroetako bat da EHU.

Contenido Patrocinado

Fotos

Vídeos