http://static.elcorreo.com/www/menu/img/zurekin-desktop.jpg

Miren Amurizak eskuratu du aurtengo Igartza Saria

Miren Amuriza idazle eta bertsolaria.
Miren Amuriza idazle eta bertsolaria. / Elkar

Bere azkenengo lanak, 'Paperezko txoriak', Bizkaiko herri txiki bateko baserri batean kokaturiko kontaketa du ardatz

VIRGINIA ENEBRAL

Gaur egun ospetsuak diren zenbait izen-abizenek eta etorkizun handiko idazlek osatzen dute Igartza Saria irabazleen zerrenda, hala nola, Unai Elorriaga, Karmele Jaio, Uxue Alberdi, Katixa Agirre, Eider Rodriguez, Danele Sarriugarte edo Kattalin Miner. Aurten Miren Amuriza gehitu da. Literatur sariaren sustatzaileek, hots, CAF enpresa, Beasaingo Udala eta Elkar argitaletxea, aste honetan jakinarazi zuten nor izan den XX. edizioaren hautua: Berrizko bertsolari gazteak irudikatutako hiru belaunaldiko emakumeen istorioa.

'Paperezko txoriak' nobelak Bizkaiko herri txiki bateko baserri batean kokaturiko kontaketa du ardatz. Protagonistak familia bereko kideak izango dira: Sabina Leizardi, bere alaba Karmele eta biloba Oihal. 80 urteko amamak bere burua hiltzeko saiakera egingo du eta gertaera horrek familiaren zimenduak irauliko ditu. Orduan, aringarri eta errua bultzaturik, bigarren mailako istorio bat gurutzatuko da. «Beti daukazu saria irabazteko itxaropena, baina ideia ekainean entregatu nuen, oporrak igaro dira dagoeneko, eta pixka bat ahaztuta neukan. Beraz, sorpresa handia hartu dut», onartu du Amurizak.

Aurten Euskal Herriko Bertsolari Txapelketa Nagusiko finalera heldu duenaren lehenego urratsak haur literaturan izan dira. Irati Eguren ilustratzailearekin burututako 'Bainera bete itsaso' lana iaz argitaratu zen. «Beti izan naiz irakurlezalea, baita idazlezalea ere. Orain arte haur literaturi ekin diot eta, orain, helduentzako literaturan saiatzeko aukera daukat. Erronka berria da baina prest nagoela uste dut». Prozesuaren emaitza urtebete barru ikusi ahalko da. Ordura arte, itxaron besterik ezin dugu egin.

Fotos

Vídeos