http://static.elcorreo.com/www/menu/img/zurekin-desktop.jpg

Katuen koloniak kontrolik gabe ugaritzea saihesteko programa, Getxon

'Kaleko katua naiz baina ez naiz arriskutsua' goiburupean programaren euskarri nagusia informazio eta sentsibilizazio-kanpaina bat da

ELCORREO.COM

Kaleko katuak hartu, antzutu eta udalerriko beren jatorrizko koloniara bueltatzeko programa abiatu du Getxoko Udalak. Programa honen bidez koloniak kontrolik gabe ugaritzea eta auzokideen arteko gatazkak sortzea saihestu nahi da, baita animalia horien bizi-kalitatea hobetu ere, Imanol Landa alkateak eta José Luis Landa Ingurumen zinegotziak gaur eskainitako prentsaurrekoan nabarmendu dutenez.

'Kaleko katua naiz baina ez naiz arriskutsua' goiburupean, programaren euskarri nagusia informazio eta sentsibilizazio-kanpaina bat da. Bertan folietoak banatuko dira postontzien bitartez eta kartel eta seinaleak ipiniko dira interesgarriak diren hainbat puntutan.

Jakina da kaleko katuak egon badaudela, baina, gainera, oso erraz ugaltzen direnez, kaleko katu kolonia ugari sortzen dira hiriguneetan, eta horrek eragozpenak sortzen ditu. Katu talde edo kolonia guztiak, batetik bestera ibiltzen badira ere, jabego pribatuetako lorategi, parke edo ortuetan kokatu ohi dira -kolonia batzuk eta hiri barruan dauden talde txikiagoak Gobela ibaiaren inguruetan, Santa Ana auzoan esaterako, daude kokatuta.

«Arrazoi horregatik, orain arte, arazo hori duten jabego-erkidegoei laguntzeko eskaintza egin diegu Udaletxetik: kolonia horiek, animalia horiekin sortzea proposatu diegu, parasitoak kenduta, antzututa, identifikatuta, kontrolatuta eta osasuntsu. Jakin badakigu auzotarrak kezkatuta daudela problematika honekin, eta horregatik urrats bat gehiago egitea erabaki dugu era honetako kanpainak antolatuz, animalia hauen bizi-kalitatea zaindu eta hobetzeko proposamenari buruz hiritarrak informatu eta sentsibilizatzeko; halaber, programarekiko atxikimenduak bildu nahi ditugu. Arazoa pairatzen duten auzotar komunitateen ardura, ekimenak eta laguntza eskertu nahi ditugu eta haietako gehienek gure proposamena parteka dezaten nahi dugu», mahaigaineratu du alkateak.

Bizi-kalitatea hobetu eta parasitoak kendu

Zenbaitetan, Udalak hainbat ekimen sustatu eta lagundu ditu, diruz eta antolaketan parte hartuz, kolonia horiek kontrolatzeko udalerriko toki batzuetan, hala nola, Kirol Portuan, Golf Zaharrean eta Bidebarrietan.

Ingurumen zinegotziak, José Luis Landak, bere aldetik, programaren abantailak azpimarratu ditu: «kontrolik gabeko ugaritzea saihesten da; ehizatzen jarraituko dute, beraz, ez da animalia karraskaririk egongo; ez dute beren eremua markatuko, ez dira zeloan egongo; eta antzutzearen ondorioz, antzutu gabeko katuen ezaugarri diren marrakak eta borrokak murriztuko dira eta herritarren arteko elkarbizitza baketsuagoa» izango da. «Alde batetik, programa honen bidez, beren bizi-kalitatea hobetu egingo da, errolda bat egongo da, antzutu egingo dira eta parasitoak kenduko zaizkie. Beste alde batetik, programa honen bidez, kontrolatu gabeko katu koloniek eragiten dituzten eragozpenak murriztuko dira, hala nola eremua markatzea, zikinkeria, zaratak, borrokak eta umealdiak», argitu du zinegotziak.

Temas

Euskera

Contenido Patrocinado

Fotos

Vídeos