http://static.elcorreo.com/www/menu/img/zurekin-desktop.jpg

Jaso, eman

Una Rementeria, Bizakiko ahaldun nagusia./Maika Salguero
Una Rementeria, Bizakiko ahaldun nagusia. / Maika Salguero

Krisiak kateatutako astinduen ostean, diru bilketak hobera egin du Bizkaia

JOSEBA ARRUTI

Gorabehera politikoez gain, diru kontuek baldintzatzen dituzte beti erakundeen arteko harremanak. Udalek, aldundiek zein Jaurlaritzak baliabide bila jarduten dute etengabe, herritarrentzat mesedegarri iritzitako ekimenak abiarazteko edo aspaldikoak egonkortu eta osatzeko. Bertoko eskumen banaketaren eraginez, lurraldeetako Ogasunek jasotzen dituzte zergapekoen xoxak; eta horrek funtsezko bihurtzen ditu diru banaketaren egituran.

Horregatik ari dira udalak berriz aldundietara begira, datorren urterako kontuak argitu guran. Bizkaikoei dagokienez, jada badakite 2018an 819 milioi euro jasoko dituztela Udalkutxatik. Lurraldeko Finantzen Kontseiluak eman berri dio baiezkoa zenbateko horri, aurtengoa %3 hobetuko duenari. Dirutza hori modu proportzionalean banatuko zaie lurraldeko udalerriei eta erabakigarria izango da horiek datorren urtera begirako euren aurrekontuak landu ditzaten.

Krisiak kateatutako astinduen ostean, diru bilketak hobera egin du Bizkaian; eta horri esker, aurreikuspenak betetzen ez zirelako zortzi urtetan udalek aldundiari azkenean dirua itzuli behar izan ondoren, egoera oso bestelakoa izango da oraingoan: jasoko dutenaz gain, ziurrenik beste 5,9 milioi euro gehiago ere bil bailitzakete azkenean. Zeharo itota ibili direnentzat ez da edozelango berria, eta herritar soilentzat ere ez, aldaketa hori euren kale eta auzoetan zein etxe alboko hainbat zerbitzutan antzemango baitute.

Udalak herritarrengandik gertuenekoak dira, horien kezka, ezinegon eta eskaerak xeheen ezagutzen dituztenak. Horregatik da hain garrantzitsua norabide ekonomikoaren aldaketa baietsi eta diru bilketa gizendu izanaren ondoriozko banaketa oparoagoa. Beti dagoelako zein beharri erantzun, zein zulo estali, zein egitasmo abiarazi.

Zentzuzko kudeaketak ahalbidetzen du estuasunezko sasoietan hondoa ez jotzea, herritarren benetako premiei aldioro eustea. Horretan Bizkaiko Aldundia eta udal gehien-gehienak guztiz zuhurrak izan dira beti, jasangarritasun ekonomikoa ardatz hartuta, zorpetze zoroen gurpiletatik zeharo urrunduta. Orain arnasaldia dator. Aurreko urteetakoa ahaztu ez eta, beste behin, datozenei begirakoan tentuz eta neurriz jarduteko sasoia.

Temas

Euskera

Contenido Patrocinado

Fotos

Vídeos