Hondakin organikoak biltzeko beste hiru edukiontzi izango ditu Laudiok

Aiarako kuadrillak hondakin organikoak biltzeko zerbitzua handitu egin du. Horrela beste hiru edukiontzi jarri ditu leku hauetan: Zumalakarregi etorbidean, udaletxearen aurrean; Landaluze kaleko 7. zenbakian eta Latiorrondo kalean, Apaloetako haur-parkearen aurrean. Horrenbestez, guztira, 20 edukiontzi marroi daude Laudion eta non dauden kokatuta jakiteko udalaren web-orria kontsulta daiteke.

Edukiontzi marroietan botatzen diren hondakinek poltsa konpostagarrien barruan sartuta egon behar dute eta hauek dira bota daitezkeenak: barazki eta fruta hondarrak; haragi eta arrain hondarrak: arrautza eta itsaskien oskolak eta fruitu lehorrak; prestatutako janaria, esaterako, pasta, arroza eta abar; kafe eta infusioen hondarrak; kortxoa, zerrautsa eta pospoloak; sukaldeko papera eta ezpainzapiak eta lorategi eta baratzeko hondarrak.

Materia organikoaren gaikako bilketak hainbat ingurumen-onura ditu, hala nola, biohondakina material ongarri eta energia-sortzaile gisa erabiltzen da. Gaika berreskuratzen denez, ez da berotegi efektuko gasik isurtzen atmosferara. Horrez gain, kiratsak ere saihesten dira. Bestalde, zabortegira heltzen den hondakin kopurua murriztu egiten da, eta horri esker, haien balio-bizitza luzatzen da. Azkenik, gainerako hondakin birziklagarrien gaikako bilketa hobetzen da.

Hondakin organikoen gaikako bilketa-sisteman parte hartu nahi duten pertsonek edo establezimenduek edukiontziak irekitzeko behar den giltza Udaletxean bertan hartu ahalko dute. Halaber, zerbitzuari buruzko informazioa ere eskatzeko aukera izango dute.