http://static.elcorreo.com/www/menu/img/zurekin-desktop.jpg

Hildako abeslarien erasoa

2010 urtean hil zen Ronnie James Diok azaroan bira bat hasiko du... edo.../
2010 urtean hil zen Ronnie James Diok azaroan bira bat hasiko du... edo...
Adarraren puntan

ROBERTO MOSO

Datorren azaroaren 30ean, Ronnie James Diok Helsinkin munduko bira bat hasiko du. Albiste arrunt bat izango litzateke, Dio 2010. urtetik hilda egongo ez balitz.

Ezinezkoa dirudi baina egia da. ‘2036: AC/DC Bilbon Zuzenean’ izeneko zutabea idatzi nuenetik hilabete pare bat besterik ez da pasa. Bertan, hologramaz egindako balizko kontzertu baten kritika egiten nuen. Bertaratuek taldearen unerik onenez gozatzen zuten, 1979. urtean kokatuko balira bezala, Bon Scott bizirik zegoenean eta australiarrak sasoi betean agertzen zirenean.

Hologramen erabilera, musikaren hildakoak ‘berpizteko’, hasi besterik ez da egin.

Michael Jackson ustez agertu zen Las Vegas hirian, 2014. urteko Bilboard sari-banaketan; azaldutakoak aho bete hortz utzi zituen eta malko bat baino gehiago ikusi zen bertan. Berriki esperientzia errepikatu da Mexikon, Juan Gabrieli eskainitako omenaldi batean eta Lady Gagak berak bere hologramarekin egin zuen dantza bere azken biran. Ez, ez dira jada antzinako proiekzio kaskarrak. Lortutako erreprodukzioak harrigarri bilakatzen ari dira.

Heavy Metaleko zaletuen artean, jakina, haserrea izan da nagusi. Sare sozialetan, ekimen honen kontrako milaka iruzkin agertu dira eta boikotaren deiari asko batu zaizkio. Oro har, mundu guztiak nolabaiteko astakeriatzat hartu du hau.

«Ronniek -Wendy Dio, bere alargunaren hitzetan- gogoko zituen eszena-ideia berriak probatzea. Disneyzale amorratua zen eta dagoen lekutik, gure ekimena bedeinkatzen duelakoan nago».

Egia esan, hildako ospetsuei errespetua izatea ez da, hain zuzen, oso joera nabarmena. Besteak beste, John Lennon eta Bruce Lee goi mailako autoak saltzen ikusi ditugu eta Manuel Vazquez Montalbanen irudia Kataluniako erreferendumari laguntzeko erabili zen. Berriki Pedro Ugartek gogoratzen zuen bezala, Gabriel Arestik ez zuen nahi bere izena kale bati ematea eta horrelaxe utzi zuen idatzita. Agerian dago zenbaterainoko errespetua merezi izan duen haren nahiak.

Baina horrelako lotsagabekeriak aldera utzita ‘rock hologramatikoa’ deiturikoak ez du atzera itzulirik. Omenaldi-banden boomaren atzetik -orokorrean gure idoloen nahiko kopia eskasa uzten digutenak- datozen urteetan, beharbada, musika modernoaren historian zehar izandako kontzerturik onenen erreplikez gozatzeko parada izango dugu: James Brown ‘Apollo’ aretoan, Bob Dylan Wight irlako emanaldian, Jimi Hendrix Woodstocken... Black Mirror telesaioaren atal batean egongo baikinen.

Nire lagun batek arrapostu zidan: «Baina oso hotza izango litzateke. Horrelako artistekin ez da inongo interakziorik izango». Mmmm... adimen artifizialaren laguntzaz auskalo zer ikusiko dugun...

Rockeroen amorrualdia ulertzekoa da, baina ez dakit ez ote den izango industria-iraultzan ehungailuak erretzen zituenekoa.

‘Eyellusion’ izeneko enpresa eta Wendy Dio jo eta ke ari dira lanean. ‘Sacred Heart’ eta ‘Dream Evil’ egindako biretan oinarrituko da ‘Dio Returns’ izenarekin aurkeztuko den emankizuna. Oholtza gainean egiazko musikariak izango dira era berean, ‘Disciples’ omenaldi-taldeko kideak -Dio taldean aritutako benetako musikarien iritzia jakin nahi nuke-.

Omenaldi-talde bat gehi holograma bat... Jainkoa. Reggaeton-DJ bat bakarrik falta da rock zaleen furiak estadioak sutan jar ditzan.

Contenido Patrocinado

Fotos

Vídeos