http://static.elcorreo.com/www/menu/img/zurekin-desktop.jpg

Gorka Urbizuk eta Izarok rock and roll munduko bizipenak jorratuko dituzte gaur Gasteizen

SERGIO EGUÍA

Berri Txarrak taldearen sortzaile den Gorka Urbizu eta Izaro rock abeslari eta musikagilea izango dira gaur, asteartea, hilak 10, Gasteizko Artium Museoan (19:00etan) ROCKOMUNIKAZIOA (Artea, hizkuntzak & rock and rolla) euskarazko jardunaldiaren protagonista. Ekitaldi hori MondragonLinguaren TOPAKEtalk programaren baitan sartzen da.

Oñatiko Kultur Etxean eta Donostiako Koldo Mitxelena Kulturgunean egin da dagoeneko ekitaldi hau eta bietan aretoak bete egin dira guztiz. Topaketa honetan, bi musikariek elkarrizketa lasai bat izango dute Berri Txarrak taldeko gitarra-jole eta abeslaria bezalako izen handiko rock-musikari baten eta Mallabiako artista bezala karreraren hastapenetan den artista baten esperientziak aurrez aurre jartzeko. Rock and rolleko musikari baten bizitza inguratzen duten gaiei buruz mintzatuko dira: musikaren industria, mundu horretan dagoen sexismoa, lan-prekarietatea, errepidea, sorkuntza-prozesua… Beren bizitza artistikoa inguratzen duten hizkuntzekin duten harremanaz ere hitz egingo dute, bai abestien letrak idaztean, bai beren biretan komunikatzeko ere.

Amaiera gisa, artista bakoitzak beste artistak sortutako abesti bat joko du gitarra akustikoarekin.

Gaiarekin lotutako eta musikeriek aukeratutako, Artiumeko Bildumako bi pieza egongo dira ikusgai biharko ekitaldian: Turn on the radio izeneko Eduardo Balanzaren instalazio bat eta Patti Smith-en argazki bat.

Gorka Urbizu (Lekunberri, 1977) Berri Txarrak taldeko gitarra-jolea eta abeslaria da. Bere taldea, gaur gaurkoz, euskarazko rock-talde nagusia da. 1994an sortu zenetik, estudioko zortzi disko eta

hainbat bilduma editatu ditu, eta eszenatoki askotara igo da, Euskal Herrian eta Europan ez ezik, baita Ameriketako Estatu Batuetan, Japonian edo Latinoamerikan ere.

Urbizu Coloradotik iritsi berria da. Hantxe pasatu du udaren zati handiena, Bill Stevenson ekoizlearen (Descendents, Black Flag…) eskutik disko berri bat grabatzen bere power hirukoteko beste bi taldekideekin batera.

Izaro Andrés Zelaietak (Mallabia, 1993) hiru urte soilik daramatza musikaren munduan, baina Paradise abestiarekin agertu zenetik hazi eta hazi ari da. Beste lau musikarirekin batera taldea osatu ostean, bere lehen diskoko (Om) abestiak aurkezten aritu da azken urtean, Izaro izen artistikoarekin. Une honetan abesti berriak grabatzen ari dira. Hiru hizkuntzetan konposatzen eta abesten du: euskaraz, gaztelaniaz eta ingelesez.

Ekitaldi hau dohanik da baina joateko MondragonLinguan-eko edozein zentroan hartu behar da gonbidapena edo, bestela, izena eman www.mondragonlingua.com webgunean.

Fotos

Vídeos