http://static.elcorreo.com/www/menu/img/zurekin-desktop.jpg

Gasteizek helmuga berde gisa agertuko du bere burua FITUR azokan

Gasteizek helmuga berde gisa agertuko du bere burua FITUR azokan

Berriro ere, enbaxadore xarmagarriak izango ditu, FesTVal-aren bitartez

I.AGOTE

FITUR nazioarteko feria urtarrilaren 17tik 21era bitartean egingo da, Madrilen. Gasteizek Estatuko helmuga berde nagusi gisa agertuko du bere burua azokan, merkataritza tradizionalaren eskutik eta Eraztun Berdearen 25. urteurrena eskaintzaren ikurtzat hartuta; izan ere, ondare historikoa, natura, tradizioa eta berrikuntza nahasten dituen eskaintza izango da, iraunkortasunaren marka eramango duena. Gainera, hirigunearen gainetik “hegan” ibiltzeko eta hainbat baliabide turistikoren barruan sartzeko bide ematen duen programa digital bat aurkeztuko da, ordenagailu, tablet eta mugikorretan erabil daitekeena.

“Hiri erakargarria aurkeztu nahi dugu, eta ez bakarrik ondare historiko-artistiko aberatsagatik eta hiri egituragatik. Gure ustez, askotariko arlotan hiri berdea garela agertu, sustatu eta ezagutarazteko unea da. Baita arlo ekonomikoan ere, eta zehazkiago, merkataritza eta ostalaritzan. Hainbat denda eta ostalaritza establezimenduren eskutik, erakutsi nahi dugu Gasteizek baduela berezko nortasuna duen eskaintzarik, beste hiri batzuetan aurki daitezkeen negozioez gain”, nabarmendu du Enpleguaren eta Garapen Ekonomiko Iraunkorraren zinegotzi Nerea Melgosak. Hiriko establezimendu tradizionalen ordezkariak FITUR azokara joango dira, “oso bertakoa den eskaintza” baten enbaxadore gisa, “zeinak gure hiriari ospea eman baitio, eta bisitariei beren egonaldiaren oroigarri atsegin eta gozoa eramatea ahalbidetzen baitie”, azaldu du Nerea Melgosak.

Horretaz gain, Gasteizen standean proiektatuko den promozio-bideoan, saltokiak eta ostalaritzako establezimenduak izango dira bisita-txartel nagusietako bat, “iraunkortasunaren, ingurumenaren, aniztasunaren aldeko apustu egin duen hiri bat erakusteko, horiexek baitira bere egin dituen ezaugarriak, eta egunero defenditzen dituenak. Bertako ekintzaileek sortutako negozioak dira, eta familia bereko hainbat belaunaldik gidatutakoak, mantenduz eta berrituz, kontsumo-ohitura berriei egokitzeko”, Nerea Melgosak esan duenez.

Gasteiztarrek eta bisitariek aurki dezaketen “slow” eskaintza osoaren erakusgarri bat agertzen da bideoan. “Slow shopping deritzon joera horren barruko negozioak dira, 0 kilometroko edo gertuko jakien alde egin baitute, bezeroak fidelizatzearen alde, prestakuntzaren bidez, gertutasuna eta berotasuna iradokitzen duten espazio erosoak —”etxekotuak”— sortuz. Horien bitartez, gure hirira etortzeko interesa sortu nahi dugu, eta museoak bisitatu ez ezik, saltoki eta jatetxeez gozatu dezaten, gure etxean bezala sentiarazten baikaituzte, zentzumenak pizten, bisitariek beren jatorrizko lekuetan topatuko ez dituzten produktuak probatu eta erostera gonbidatzen, eta gure hiriaren arrasto ahantzezina uzten”, goraipatu du Enpleguaren eta Garapen Ekonomiko Iraunkorraren zuzendari Juncal Ibeasek.

Eraztun Berdearen 25. urteurrena

Orobat, Gasteizek ingurumen berreskuratzearen alorreko erreferente bat eramango du Fiturrera, Eraztun Berdea, 25. urteurrena beteko baitu aurten. “Eraztun Berdea, zalantzarik gabe, hiriko politika berde eta iraunkorren ikur nagusia da, baliabide turistiko indartsua, eta gasteiztar oro harrotzeko modukoa“, gogoratu du Nerea Melgosak. Gasteizko Eraztun Berdea hiria inguratzen duten parke multzo bat da; ekologia eta paisaia balio handiko parkeak dira, aisiarako korridore ekologikoen bidez lotuak. Gasteiztarrek zein bisitariek asko estimatzen dute. Gainera, azken hilabeteetan Udalak zenbait berrikuntza egin ditu inguruan. Olarizuko etxaldea berriro ireki eta bertan harrera egiteko baliabide bat jarri da, Eraztun Berdea pedalei eraginez ahalbidetzen duen bizikleta-alokairuko zerbitzu berriarekin, eta Atarirako ‘buggie’ elektrikoak eta ‘scooterrak’ erosi dira, Salburuko parkea ororentzat irisgarria izan dadin. Eraztun Berdea Gasteizko baliabide turistiko nagusietako bat izaten jarrai dezan, Fiturren inguru horretako mapak banatuko dira.

Telebistako enbaxadoreak

Bigarren urtez jarraian, Gasteizek telebistan oso ezagun diren bi enbaxadoreren laguntza izango du Fiturren; laster jakinaraziko da nortzuk diren. FesTValaren eskutik, bi aurpegi ezagun horiek Gasteiz promozionatzen lagunduko dute FITUR azokan. “FesTVal jaialdia sendotu egin da Gasteiz marka proiektatzen eta hiria mapan jartzen duten hiriko ekitaldien artean. Telebistako aurpegi ezagunenen presentziari esker, gure hiria telebistaren hiriburua bihurtzen da egun batzuez, eta gurera bisitan datozenak zein telebistako “izarrek” oihartzuna duen publikoa harritu eta harrapatzen ditu”, azaldu du Turismo zinegotziak.

Jauregi, museo eta elizetan barrena paseatu, mugikorretik

Gasteizek Madrileko ferian aurkeztuko duen beste berrikuntzetako bat baliabide edo programa informatiko berria da, hiriko turismo-baliabide nagusiak ordenagailuan, telefono adimentsuetan edo tabletetan zuzenean bisitatu ahal izateko. Izan ere, Udalak hiriko baliabide nagusiak digitalizatu ditu, eta orain barrutik bisitatu daitezke, “street view” irudien antzekoekin. Orain arte, bakarrik ibilbide turistikoko zenbait leku baino ez zeuden digitalizatuta, hainbat erakundek edo Udalak egindako lanaren bidez. Aurrerantzean, bilduma osoa eskainiko da.

Flying Willy deritzon teknika digitalaz landu den proposamen horretaz gain, Turismo zinegotziak Fiturrekin lotutako beste baliabide batzuk aurkeztu ditu.

Izan ere, Udalaren proposamenari esker ordenagailua, telefono adimentsua edo tableta baliatuz edonor hiriko talaia garaienetik “aireratu” eta hirigunearen gainetik hegan ibili ahalko da, hiriko turismo-baliabide nagusiak zehaztuta dituelarik. Hartara, klik bakarra eginez, Farolen Museoan; San Bizente, San Pedro eta San Migel elizetan; harresian; Goiuri eta Eskoriatza-Eskibel jauregietan, Europa jauregian eta beste leku batzuetan sartu ahalko da, baita Salburuko parkeraino iritsi ere.

Contenido Patrocinado

Fotos

Vídeos