http://static.elcorreo.com/www/menu/img/zurekin-desktop.jpg

Gasteizek azterlan bat aginduko du Santa Barbara plazako lurpeko aparkalekuan

Gasteizek azterlan bat aginduko du Santa Barbara plazako lurpeko aparkalekuan

SERGIO EGUÍA

Gasteizko Udalak Santa Barbara plazako lurpeko aparkalekuak izan ditzakeen patologiak analizatuko ditu, azterlan tekniko bat eginez. Izan ere, azpiegiturak ur filtrazioak izan ditu urteetan, lur azaleko parterreak direla kausa. Horrenbestez, Tokiko Gobernu Batzarrak Santa Barbarako lurpeko aparkalekuaren egiturak dituen patologiak konpontzeko proiektua idazteko eta obra zuzentzeko kontratazio-dosierra onetsi du gaur goizean. Lehia-oinarria 72.500 euro da, eta txostena gauzatzeko hiru hilabeteko epea emango da, esleitzen denetik.

Azterlan osagarri horrek ez du eraginik izango Santa Barbara plaza eta ingurua eraberritzeko aurreikusi diren epeetan, baina bai lanen planifikazioan. Aparkalekua otsailean ixtekoa zen, baina gerorako utziko da. Oraindik ez da data zehaztu, baina kontuan hartuko dira inguruko merkatarien eskariak, eta beherapen eta kontsumo garaiak errespetatuko.

Aparkalekuko lanak egiten ari ziren bitartean, sabaietako eta zutabe batzuetako pintura altxatu egin zen, eta armadura agerian geratu; horren ondorioz, Udalak leku batzuetan herdoila eta dilatazioek eragindako arrakalak antzeman zituen, baita egoera txarrean zeuden zutoinak ere. Aparkalekuan ura sartzeak sortu ditu horiek, eta hain zuzen ere, horixe konpondu nahi da Urtaranen gobernuak sustatutako esku-hartze integralaren bidez, besteak beste.

Hori ikusirik, informazio gehigarria eskatu zitzaien egituretako espezialistei, zeinek kalte arinak zirela adierazi baitzioten Udalari, aparkalekuaren antzinatasunak eta eraiki zeneko garaiko teknikak eta kalitateak eragindakoak. Orobat adierazi zuten segurtasuna bermatuta zegoela, baina egitura zenbateraino dagoen hondatuta aztertzeko gomendatzen zuten, begi hutsezko ikuskaritza baino metodo zorrotzagoak erabiliz.

“Nahiago izan dugu eragotzi urte batzuk barru gabeziak arazo bihurtzea. Nahiago dugu lana ongi egitea, aurreikuspenez eta bermez. Horregatik agindu dugu azterlana, patologien zer-nolakoa zehazteko eta egin beharrekoak, epeak eta kostua balioesteko”, azaldu du Ingurumenaren eta Espazio Publikoaren zinegotzi Iñaki Prusillak. “Garbi gera bedi segurtasuna bermatuta dagoela, eta aparkalekuko egituraren arazoak ez direla larriak”.

Santa Barbarako lurpeko aparkalekuaren egiturak dituen patologiak konpontzeko proiektuaren idazketak alderdi hauek barne hartzen ditu: egituraren ikuskaritza eta kalteen kartografia, egituraren ezaugarritzea, hormigoiaren ezaugarritzea, armatzeko altzairuaren ezaugarritzea, hormigoiaren entsegu kimikoak, egitura-kalkuluak… Agindu teknikoen agiria ere idatziko da, egin beharreko lanak, neurketak eta aurrekontuak zehaztuta. Horretaz gain, enpresa esleipendunak argazki erreportajea egin beharko du, eta antzematen diren patologien planoa.

Contenido Patrocinado

Fotos

Vídeos