http://static.elcorreo.com/www/menu/img/zurekin-desktop.jpg

Euskara ez dakitenek jakitea eta dakitenek erabiltzea lortu nahi du Getxok

Egizu Getxo Euskaldun elkartearekin duen kontratua urtebetez luzatu du Udalak

ELCORREO.COM

Egizu Getxo Euskaldun elkartearekin duen kontratua urtebetez luzatu du Getxoko Udalak, Sendi programa antolatzeko eta kudeatzeko, 24.200 euroko zenbatekoan. Aurten 12. urtea beteko duen programa honen helburua da 0 eta 12 urte bitarteko umeek, euren gurasoek eta familiakoek euskarara hurbiltzea, ikastea eta erabiltzea; hau da, ez dakitenek jakitea eta dakitenek erabiltzea. Horretarako mota desberdinetako jarduerak antolatzen dituzte urtean zehar, beti ere, umeen gurasoek euskara erabiltzeko eta familia osoak euskarazko jardueretan ondo pasatzeko. 

Sendi Getxoko Udalaren eta Egizu Euskara elkartearen arteko lanaren fruitua da eta gurasoen, ikastetxeen eta guraso elkarteen konpromisoa eta laguntza ditu. Datozen hilabeteotan izango diren berritasunen artean, 0-18 hilabete bitarteko haurrentzako saioak izango dira eta Ustruku taldea berriro martxan jarriko da.

Hortaz aparte, aipatzekoa da une honetan aurtengorako Olgetan Euskaraz izeneko ekimeneko taldeak osatzen ari direla. Bi eta bost urteetako haurrei eta beren gurasoei eta etxekoei zuzenduta, euskaraz jolasteko eta kantatzeko gunea eskaini nahi du ekimenak, dinamizatzaile baten laguntzarekin, hainbat taldetan elkartuta.

Urtero bezala, datozen asteotan tailerak, irteerak eta solasaldiak ere izango dira, besteak beste. Informazio gehiago nahi dutenek www.egizu.eus webgunean aurki dezakete.

Nahikoa ez balitz, Udaberrirako 0-18 hilabeteko umeak dituzten familientzako saioak prestatzen ari dira sustatzaileak, ahozkotasunarekin lotutako baliabideak lantzeko, hau da, ume-hizkera, altzoan jolasteko zein lokartzeko kantuak, esamoldeak… Bide batez gurasoen arteko harreman hizkuntza euskara izatea nahi da, sareak zabaltzeko.

Bestalde, datorren irailean Ustruku taldea martxan berriro jartzeko asmoa dago, ahozkotasuna lantzeko taldea, edozein adinetako umeek, guraso zein aitite-amamek parte hartzen, aho-korapiloak, esku-jolasak, asmakizunak, txisteak, tradiziotik datozen kantuak konpartitzeko.

Esan beharra dago 2017an 750 lagunek baino gehiagok hartu zutela parte Sendi programaren barruan antolatutako jardueretan. Hain zuzen ere, Olgetan Euskaraz ekimenean 64 familietako 151 pertsonak hartu zuten parte, zazpi taldetan banatuta, 10 astez elkartzen. Bestalde, urtean zehar 29 jarduera desberdin ere izan ziren, horien artean irteerak, tailerrak, egun pasak, bisitak, jolasaldiak, ahozkotasuna lantzeko saioak, hitzaldiak eta abar.

Temas

Euskera

Contenido Patrocinado

Fotos

Vídeos