http://static.elcorreo.com/www/menu/img/zurekin-desktop.jpg

Zurekin

Euskara bizi

Durangoko Azokaren iazko edizioa./Félix Morquecho
Durangoko Azokaren iazko edizioa. / Félix Morquecho
JOSEBA ARRUTI

Liburu eta diska azokek ekarpen handia egin dute beti, kultur zabalkunderako oparo izan diren heinean. Digitalizazioak eta streaming bidezko zerbitzuek neurriren batean badoan garai bateko nolabaiteko xarma nostalgikoa ematen diete egun, horiek are gehiago estimatzerainokoa. Orriak fisikoki laztantzeak, musika ukimenarekin osatzeak badu zentzumen-gozamenerako aparteko ahalmen bat. Teknologiak hotza izaten jarraitzen du, zenbat eta aspaldikoagoa izan belaunaldi bat orduan eta dezente nabarmenago.

Badira azokak eta azokak. Denek dute helburu komertziala, eta hori ona da, etekinek kultura baten egoera ere islatzen dutelako. Baina apurren batzuek badituzte bestelako dohain estrategikoak, hizkuntza bati lotutakoak esaterako. Biziraun edo hazi guran dabiltzanen agertoki direnak izan ohi dira horiek, hiztun komunitatea indartu eta kultur sare ahalik eta sendoena osatu guran ari direnenak.

Horietakoa da Durangokoa. Bere hazkundea euskararenaren pareko izan da azken 52 urteotan. Gabeziaz betetakoa zena tarteko hainbat xede betetzen joateak eraman du dagoenera. Moda ere bihurtu da, eta ez da txarra, kultura moda izatea ez baita gutxiestekoa, osasun seinale baizik. Azal huts, parke tematiko gisa hartzen ez den bitartean, jakina. Hangoa erakargarri, aberasgarri, elikagai baldin bada; urtean behinekotik haragoko gogoa adierazten badu.

Gaurtik abenduaren 10erakoari txinparta isolatu barik su gozagarri izatea dagokio, hainbat dinamika indartzeko katalizatzaile gisa ekitea. Bertaratzea keinua besterik ez bada alperrik gabiltza, itsu. Euskarazko kultura kalitate handikoa da, ezagutzen ez dutenetakoak maiz errukitsu hurbiltzen zaizkion arren. Badu lehiakor izateko behar besteko heldutasuna, baditu adimen handiko sortzaileak. Ñabardurak eta aniztasuna ere bai.

Durangoko azokara joateak ohikoaren segida behar luke, kontsumo molde zehatz batekin bateragarri. Itxuroso hazi da, egokitzen jakin du, hurbiltzen zaizkion guztiak hartzen ditu abegikor. Orohar, egina du zegokiona. Hiztun eta irakurleena da erronka, orain. Euskara aldiro erabili barik bizitzeko modura eramatea, euskarazkoa oso noizean behin kontsumitu beharrean arrunt bihurtzea. Izenetik izanera, azaletik mamira jauztea.

Temas

Euskera

Contenido Patrocinado

Fotos

Vídeos