http://static.elcorreo.com/www/menu/img/zurekin-desktop.jpg

Euskal sortzailea zara? Hona hemen zure aukera!

Eiken Klusterrak eta Next Station plataformak euskaraz eta 4K teknologian lehendabiziko telesail digitala sortu nahi dute

IZASKUN MOYANO

Punta puntako teknologia eta berrikuntzak pixkanaka ikus-entzunezko munduan murgiltzen ari dira, eta euskal merkatua ez da gutxiagorako izango. Eiken Klusterrak eta EiTBk gidatutako Next Station plataforma euskal sortzaile onenaren bila ari dira. Zertarako? Ba 2018an euskaraz eta 4K teknologian burutuko den lehendabiziko telesail digital sortzeko.

Honetarako, ideien lehiaketa bat antolatu dute, non edonork parte har lezakeen. Izena ematen duen orok proposamen bideo bat bidali behar du sare sozialen bidez, datorren azaroaren 25a baino lehen. Ondoren, guztien artean hiru onenak aukeratu eta hauek prestakuntza jakin bat jasoko dute. Azkenean, irabazleak, telesaila grabatzeko ametsa errealitate bihurtuko du. Hau, EiTBn emititzeaz gain, nazioartera ere zabalduko da.

Proiektua, XXI. mendeko entretenimendu-proposamen berria da, azken aldian alde batera uzten ari baita zinema, telebista eta tankerako formatuak. Beraz, ideia berritzaile honen sustatzaile dugu Next Station plataforma: ikus-entzule berriei bideratutako ikus-entzunezko formatu berriak sortzeko laborategia. Honek, Bizkaiko Foru Aldundia, Gipuzkoako Foru Aldundia, Euskaltel, Eusko Jaurlaritza eta Mondragon Unibertsitatearen laguntza izango du.

Lan berri hau, asmo handikoa da. Izan ere, denboraldi oso bat filmatzea du xede; hots, sei kapitulu guztira. Gainera, profesionala izan ala ez, edonor aurkez daiteke seriea sortzeko lehiaketa honetara. Ideiok, minutu bateko luzera izan behar duen ‘selfie’ erako bideo batean edo bideo narratibo batean bidal daitezke. Gogoratu, bertan argi agertu behar dela ideiaren garapena eta honen berezitasunak. Osatzean, Next Station plataformaren Facebook profilera igorri behar da.

Guzti hauetatik hogei ideia aukeratuko dira lehendabizi. Alde batetik, aditu talde batek erabakiko du beraien ustez zein diren ideia onenak; eta bestetik, jendeak sare sozialen bidez eman ahal izango du botoa. Hiru finalistak, beka bidezko prestakuntza jasoko dute Mondragon Unibertsitateak Bilbon duen egoitzan, BFF eraikinean eta Donostiako Tabakalera Kultura Garaikidearen Nazioarteko Zentroan. Azkenean, irabazlea aukeratu eta lana burutzen hasiko dira, ondoren Netflix edota HBO bezalako plataformetan emititzeko, besteak beste.

Temas

Euskera

Fotos

Vídeos