Euskadiko Orkestra Sinfonikoak filmen soinu bandak interpretatuko ditu Zinemaldian

Euskadiko Orkestra Sinfonikoak filmen soinu bandak interpretatuko ditu beste behin Donostia Zinemaldiaren baitan, orkestrak berak, SGAE Fundazioak eta Zinemaldiak antolaturiko saioan. Emanaldia irailaren 23an izango da, Belodromoan, eta Zinemaldiko arduradunek ziurtatu dute ordu eta erdiko «ikus-entzunezko gozamena» izango dela. Saioa eguerdiko 12etan hasiko da eta sarrera doakoa izango da.

 Horrela, antolakuntzak jakinarazi duenez, 'El laberinto del fauno' (Guillermo del Toro), 'Bienvenido Mr. Marshall' (Luis García Berlanga), 'O Apóstolo' (Fernando Cortizo), 'Nur eta herensugearen tenplua' (duela gutxi zendutako Juanba Berasategirena, omenaldi gisa) eta 'Los Borgia' (Antonio Hernández) lanen musikaren interpretazio sinfonikoa entzun ahal izango da emanaldian.

 Partitura horien egileak Javier Navarrete, Jesús García Leoz, Xavi Font, Joserra Senperena eta Angel Illarramendi dira, hurrenez hurren, eta horietako batzuk kontzertura bertaratu eta eszenatokira igoko dira lana aurkezteko. José Miguel Pérez-Sierraren zuzendaritzapean, EOSekin batera ariko dira Nora Goyalde (mezzosopranoa) eta Sergio Falque (baxua) bakarlariak eta Donostiako Orfeoia. Aldi berean, 400 metro koadroko pantailan Carlos Rodríguezek emanaldirako sorturiko irudien muntaia proiektatuko da.

Esan bezala, sarrera doakoa da, baina beharrezkoa izango da aurrez gonbidapena jasotzea, irailaren 16tik 22ra, Zinemaldiak Kursaal Elkargunean eta Okendo plazan dituen informazio guneetan, 09.00etatik 20.00etara; Donostia Turismoa bulegoan ere jaso daitezke, astelehenetik larunbatera 09.00etatik 20.00etara, eta igandean 10.00etatik 19.00etara.

• Temas
• Luis García-Berlanga Martí
• Luis García Berlanga
• Guillermo Del Toro
• Sociedad General de Autores
• Festival de Cine de San Sebastián (Zinemaldia)