http://static.elcorreo.com/www/menu/img/zurekin-desktop.jpg

Etxe Berdeak programan parte hartu duten berrogeita hamar familiek opariak eta diplomak jaso dituzte Salburuko gizarte etxean

SERGIO EGUÍA

Gasteizko alkate Gorka Urtaran Etxe Berdeak programaren amaiera ekitaldian izan da gaur goizean. Berrogeita hamar familiak hartu dute parte Gasteizko Udalak IGI-Ingurugiro Gaietarako Ikastegiaren bitartez garatzen duen ekimen horretan, zeinak Vital fundazioaren sostengua eta Leroy Merlinen laguntza baitu. Programaren azken edizioan parte hartu dutenek opariak eta diplomak jaso dituzte Zabalganako gizarte etxean.

Beren eguneroko erabaki eta ohiturek ingurumenean eta gizartean duten eraginaz kezkatuta dauden familiei zuzendutako heziketa programa da, etxearen –eta ondorioz, hiriko ingurumenaren– kudeaketa arduratsuagora aldatzeko prozesuan laguntzeko xedez. Programaren bidez, ur- eta energia-kontsumoaren autokontrola sustatzen da, aurrezteko neurrien eta jokabideen bitartez, eta erosketa etikoagoa eta ekologikoagoa egiten laguntzen.

Alkateak zorionak eman dizkie edizio honetako parte-hartzaileei, eta gogorarazi du zein garrantzitsuak diren “keinu txikiak, hala nola kontsumo txikiko eta led teknologiako bonbillak instalatzea; erabiltzen ez ditugun etxetresna elektrikoak itzaltzea; berogailua, edo arropa- eta ontzi-garbigailuak eraginkortasunez erabiltzea…; azken batean, Gasteiz hobea izan dadin, ingurumenarekin konprometitua, eta European Green Capital den aldetik erreferentea izaten jarrai dezan”.

Vital fundazioaren lehendakari Jon Urrestik ere zoriondu ditu parte hartu duten familiak; haren esanetan, “ingurumena zaintzea kezka globala da, baina toki mailan ere eman behar zaio erantzuna. Vital fundazioak hamabost urte daramatza ingurumen arazoekiko erantzukizun kolektiboa indartzearen alde egiten, hiri inguruneen iraunkortasunaz sentsibilizatzen, eta herritarren parte-hartzea eta prestakuntza sustatzen”.

Contenido Patrocinado

Fotos

Vídeos