http://static.elcorreo.com/www/menu/img/zurekin-desktop.jpg

Zer eskatu

Urte berria hasi bezain pronto helburu berriak lortzen saiatzen gara. Horien artean, erretzeari uztea ohikoenetakoa izaten da./Reuters
Urte berria hasi bezain pronto helburu berriak lortzen saiatzen gara. Horien artean, erretzeari uztea ohikoenetakoa izaten da. / Reuters
JOSEBA ARRUTI

Urte berria hasteak badu eraginik aurrera begirakoen plangintzan. Denboran nolabaiteko hausturaren irudipena ematen du, bestelako aro bati ekitearena. Ez da egiazkoa, noski, maila psikologikokoa barik, baina baliagarri zaie norbere asmoei, grinei, itxaropenei. Norbere ongizateari. Linealtasuna jasanezina bihurtzen da luzaroan, eta gezurrezko jauzien beharra dago hutsetik edo abiatzeko, egin ez direnak behingoz betetzen saiatzeko, bizitza hobera bideratzeko.

Hala, egutegiak eskaintzen dituen aukerak arnasbide dira. Urtarrilaren lehenek asmoen zerrenda egiteko balio dute, aurreko urteko gaitzak uxatzen saiatzeko, bat bateko jauziari esker biziberritzeko. Gehienetan, egunen joan-etorriak zimeltzen ditu gurari guztiok, errealitatea aingura astuna delako, bizitzak zein bere baldintzek ez dakitelako urte berriez zein horiei atxikitako berehalako berpizteez.

Baina ez dira gutxietsi behar gizakiengan urte aldaketek onerako ahalbidetzen dituzten bultzadak. Hor badelako oso sakoneko indar bat, ondo egindakoei segida ematekoa zein sasoi txarrenak gainditzeko kemena pilatzekoa. Iragana ere horrela sailkatzen da, urteka, osotasuna atalka banatzeko behar horri erantzunez. Beraz, izango da hasten dena egoki baliatzen asmatuko duenik, gabeziak edo mina gainditzeko gauza izango denik.

Garai honi dagozkionak dira norbereikoikeria, jendarteko bakardadea eta halakoak. Inoiz baino komunikatuago dagoen munduan, gizabanakoak hainbat frustraziori egin behar die aurre, nahi eta ezinei. Onarpena bilatzen da, birtuala bada ere, eta gezurrezko bizimoduak asmatzen dira horretarako, garai bateko itxuren pareko. Ez dago, baina, faltsutik ezer eraikitzerik, norbera ez denetik hobetzerik. Heldutakoan ikasten dute askok hori; eta beste hainbatek, inoiz.

Bizitza gazi-gozoz beteta dago. Horren jakitun izanda baino ezin zaio aurre egin. Norbere esku dagoena hobetzea, haatik, katartikoa izan daiteke, muga berrietara eramaterainokoa. Gizakiak baduelako aparteko indarrik, bere burua nolabait berregitekoa eta munduan bestela kokatzekoa.

Oinak lurrean hasi behar da urtea, ondo neurtutako asmoen bila. Gizaki gisa osatzeko, barrukoa hobeto ezagututa kanpora begira sendoago jarduteko. Urtarrilaren lehenak egun bereziak dira, zinez. Dena posible dela amets egitekoak.

Temas

Euskera

Contenido Patrocinado

Fotos

Vídeos