http://static.elcorreo.com/www/menu/img/zurekin-desktop.jpg

Ernesto Netok 'White Bubble' artelana eman dio Guggenheim Museoari

'White Bubble' obra./E. C.
'White Bubble' obra. / E. C.

Artista brasildarraren obrak «zeharkatzeko, bertan bizitzeko, sentitzeko eta usaintzeko» sortutako piezak dira

ELCORREO.COM

Ernesto Neto artista brasildarrak 'White Bubble' (Burbuila zuria) artelana eman dio Guggenheim Bilbao Museoari. Obra hau «giza gorputzaren mugen inguruko esplorazio eta hausnarketa garrantzitsua» da, Bilboko museoaren arduradunek adierazi dutenez.

2014an, Guggenheim Bilbao Museoak 'Ernesto Neto: naraman gorputza' aurkeztu zuen, 1964an Rio de Janeiron jaiotako artistaren lanari eskainitako atzera begirakoa. Brasilgo sortzaile garrantzitsuenetakoa da Neto, eta nazioartean aski ezaguna bere eskulturei esker. Lan organikoak egiten ditu, maiz tamaina izugarri handikoak, poliamida elastikoko ehun erdi-gardenekin eratuak eta aldizka hainbat materialekin beteak.

Guggenheim Bilbao

25 urtetik gorako ibilbidean, Netok lanen inbentario handia bildu du, marrazkietatik hasita tamaina handiko instalazioetaraino. «Zeharkatzeko, bertan bizitzeko, sentitzeko eta usaintzeko» sortutako piezak dira, eta piezen eta ikusleen arteko elkarrizketa dute helburu, «norberak bere gorputzarekin eta zentzumenekin esperimentatuz, aldi berean, giza gorputzaren antzera, piezak hauskorrak eta delikatuak direla ahaztu gabe».

Obra

Ernesto Netok Guggenheim Bilbao Museoari emandako lanak 'Burbuila zuria' (White Bubble, 2013/17) du izena, eta 2014ko erakusketako 'Gertaeren hiperostertza' osatzen zuten elementuetako bat du oinarri. Netok berariaz berritxuratu zuen pieza, Frank Gehryk diseinatutako eraikinaren espazio ikonikoetara egokitzeko.

«Artearen esperientzia, tradizionalki bisuala, zentzumen anitzentzako une bihurtu du artistak, eta berak sortutako unibertsoaren azalerak zeharkatu eta ikuskatu ahala, zentzumeneko une horrek sentsazio puruetara darama gure arreta. Horren bidez, lanak eta ikusleek bat egitea bilatzen du artistak, eta ikusleek esperimentatzea elkartze intimo horiek nola bilakatzen gaituzten gu baino handiagoa den zerbait», azaldu dute.

Lanak hartzen duen espazioan zehar ibiltzen hasi orduko, bisitariak egitura gardena bere gorputzaren pisuarekin aldatzen doala nabarituko du, eta atzean uzten duen arrastoa eraldatzen joango da, ondoren etorriko diren gorputzen inpresioak eraginda. «Hala, giza gorputzaren mugen inguruko esplorazio eta hausnarketa garrantzitsua da 'Burbuila zuria'», adierazi dute Guggenheimeko Museoko langileek.

Fotos

Vídeos