http://static.elcorreo.com/www/menu/img/zurekin-desktop.jpg

'Elkarrekin bizitzen ikasi' programak lan-mahaiak, erakusketak eta Janeren ibilaldi berriak proposatzen ditu

Bizikidetza eta Aniztasuneko zinegotzi Nerea Melgosak “elkarren artean trukatzeko eta ikasteko espazio horretan” parte hartzera gonbidatu ditu herritarrak, “aniztasunaren ikuspegitik komunitatea eraikitzeko”

I.AGOTE

Bizikidetza eta Aniztasuneko zinegotzi Nerea Melgosak eta zerbitzu horretako buru Estibaliz Peredak 2018ko “Elkarrekin bizitzen ikasi” programa aurkeztu dute, “elkarren artean trukatzeko eta ikasteko zein komunikatzeko gunea, komunitatea eraikitzeko erronkari erantzungo diona. Gasteiztarrek sentsibilizatzeko eta ezagutzak zabaltzeko jardueretan hartu ahalko dute parte, topaketa prozesuetan, era aktibo eta sortzailean esku hartzeko aukera ematen duten ekitaldietan, auzoak aniztasunaren ikuspegitik esploratzeko jardueretan, eta trukerako eta ezagutza berriak elkarrekin eraikitzeko espazioetan”, nabarmendu du Nerea Melgosak.

Elkarrekin bizitzen ikasi programa 2016an sortu zen, Bizikidetza eta Aniztasun Zerbitzuaren arlo bakoitzean (bakea eta giza eskubideak, dibertsitate funtzionala eta kulturaniztasuna) pertsona eta talde esanguratsuen artean espazio didaktikoak eta trukatzeko espazioak sortzeko asmoz. Aniztasuna era eraikitzailean lantzeko estrategiaren zatia da, giza eskubideak, bakearen kultura eta aniztasuna kontuan hartzen dituen bizikidetzaren alde egiten duen hiri bat sortzeko xedez.

Aste honetan ekin zaio 2018ko jardueren agendari, Gervasio Sánchezen “Sarajevo: gerra eta bakea” argazki-erakusketa inauguratu baita Montehermoso kulturunean, Lankidetza Zerbitzuak antolaturik.

Jardueren arteko nabarmengarriena, berrikuntza baita, elkarbizitzarako komunikazioa izeneko topaketa dugu, zeinean kazetariak, giza eskubideen inguruko adituak, iritzi-liderrak eta gizarte ekintzaileak elkartuko baitira. David Diaz Jogeixek egingo du sarrera, “Giza eskubideak eta komunikabideak alor lokalean” hitzaldiarekin; talde (etniko, erlijioso zein sozial) anitzenganako etsaitasuna eta estigmatizazio prozesuen arrazoiak ulertzen lagunduko digu. Hitzaldiaren ostean, bertaratuek deontologia profesionalaz eta kazetarien praktikaz eztabaidatuko dute, giza eskubideen ikuspuntutik; batik bat, tokian tokiko informazioan praktika onekin aurrera egiteko garrantziaz, zailtasunez eta erronkez mintzatuko dira. Urtarrilaren 30ean izango da, 16:00etatik 18:30era, Montehermoso kulturunean.

Otsailaren 15ean, 19:00etan, Montehermoso kulturunean, partekatutako memoriei buruzko mahai-ingurua izango da: Elkarbizitzarako adostasun eta memoriaahalegina maila lokalean. Joera politiko ezberdinetako alkateak dituzten udalek hartuko dute parte, zeinek “Memoria partekatu baterantz” txostenak lantzen lagundu baitute.

Martxoan bi data seinalatu daude: batetik, Gasteizko martxoaren 3ko gertakarien oroitzapenezko ekitaldiak; bestetik, martxoaren 8a, Emakumeen Nazioarteko Eguna. Intxorta Kultur Elkartearekin batera “EMEEK EMANA” argazki-erakusketa antolatu da, zeinean memoria historikoa emakumeen ikuspuntutik lantzen baita. Testuinguru eta gai berarekin bi jarduera osagarri izango dira: martxoaren 6an, Zuriñe Rodríguez Larak eta Julia Monge Sarabiak “Emakumeen esperientzia kolektiboa eta historikoa berreskuratzen” hitzaldia emango dute, mikrofonoetatik urrun egon diren kontakizun alternatiboak jasotzeko orduan beti egoten diren zailtasunak eta aurrerapausoak partekatzeko xedez. Martxoaren 14an, berriz, Javier Larrauriren “La luz de aquella tierra” dokumentala proiektatuko da; 1940ko hamarkadan Mexikora erbestera joatera behartuak izan ziren emakume errepublikarren istorioa kontatzen da, eta gaur egun beren herrialdeak halabeharrez uzten dituzten pertsonek haiekin dituzten antzekotasun nabarmenak aurkitzea proposatzen.

Aipatutakoez gain, beste ekintza hauek sartu dira programan: apirilean, “Kontakizunak” jardueraren bigarren edizioa; maiatzean, Janeren ibilbidea, Abetxukun, ekainean, ibilaldi interortokulturala eta Herritartasunerako Eskola Irekiak antolaturik, Daniel Innerarityren hitzaldia, bizikidetza demokratikoaz.

Amaitzeko, Janeren ibilbideen “aniztasun funtzionaletik begira” jardueraren bigarren edizioa egingo da; hiriak dauzkan gabeziak eta abantailak aztertzeaz gain, ehun sozial eta komunitarioari ere erreparatuko zaie, pertsona ororentzako espazio eta zerbitzuen irisgarritasun eta erabilera berdintasuna bultzatzearren.

Nerea Melgosa zinegotziak gogoratu du aurten Giza Eskubideen Adierazpenaren 70. urteurrena betetzen dela, eta “Elkarrekin bizitzen ikasi” programak bat egingo du ospakizunarekin bere ekitaldi guztietan, Eskerrak giza eskubideei lema txertatuz, “uste osoa baitugu hiri honetan bizikidetza eraikitzeko oinarria izan behar dutela”.

Contenido Patrocinado

Fotos

Vídeos