http://static.elcorreo.com/www/menu/img/zurekin-desktop.jpg

EHUk unibertsitate orientaziorako azken azoka egingo du, gaur, Bilbon

Hauek aukera eskaintzen diete etorkizuneko ikasleei unibertsitatearen gradu ikasketak eta unibertsitatera sartzeko prozedura gertutik ezagutzeko

Euskal Herriko Unibertsitateak, EHU-k, 2018ko unibertsitate orientaziorako azken azoka egingo du gaur, 09:00etatik 14:00etara, Sarrikoko Ekonomia eta Enpresa Fakultatean, eta Bilboko Bizkaia Aretoan.

EHUk jakinarazi duenez, orientaziorako azokek aukera eskaintzen diete etorkizuneko ikasleei unibertsitatearen gradu ikasketak eta unibertsitatera sartzeko prozedura gertutik ezagutzeko. Hain zuzen ere, 2018-2019 ikasturtean, EHUk 92 gradu eskainiko ditu hiru campusetan.

Horietariko hiru gradu bikoitzak dira. Nazioarteko gradu bikoitzetan bi unibertsitate titulu lortzen ditu ikasleak, bat EHUk emana, eta bestea atzerriko unibertsitate batek. Hiru gradu bikoitzen artean bat berrikuntza da. Zehazki, Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitza datorren ikasturtean ematen hasiko da Gipuzkoako Ingeniaritza Eskolan.

Beste bi gradu bikoitzak dira Enpresen Administrazio eta Zuzendaritzako eta Zuzenbideko Gradu Bikoitza eta Fisikako eta Ingeniaritza Elektronikoko Gradu Bikoitza.

Beste hiru graduetan (Automobilgintzaren Ingeniaritza, Enpresen Administrazio eta Zuzendaritza, eta Prozesu eta Produktuen Berrikuntzaren Ingeniaritza) prestakuntza duala eskaintzen da. Sistema horretan ikasleek inguruko enpresetan eskuratzen dituzte hainbat gaitasun.

Unibertsitate orientaziorako azoketara interesik duen edonor hurbil daiteke, baina bereziki unibertsitate aurreko ikasleei, haien gurasoei eta bigarren hezkuntzako irakasleei zuzenduta daude. EHUko graduei buruzko informazioa aurkituko dute, eta zentro guztietako irakasleek eta Orientazio Zerbitzuko langileek arreta egin eta zalantzak argitzen lagunduko diete egin behar duten ikasketen aukeraketan, banakako zein taldeko informazio saioen bidez.

Ate Irekien Jardunaldiak, martxoan

Halaber, informazioa jaso dezakete unibertsitatera sartzeko bideen, mugikortasun programen, graduondokoen, tasa nahiz beken, unibertsitateko ostatu nahiz garraioaren, kirol jardueren, unibertsitate orientazioaren eta abarren gainean. Nahi izanez gero, gaur, orientaziorako azokaren egunean bertan, Bizkaiko campuseko unibertsitate egoitzak bisitatzeko aukera izango da: Blas de Otero egoitza eta Miguel de Unamuno Ikastetxe Nagusia.

EHUren unibertsitate orientaziorako azokak hiru campusetan egiten dira, ondoz ondoko hiru larunbatetan. Gipuzkoako azoka urtarrilaren 27an izan zen, eta Arabakoa, otsailaren 3an. Hirugarrena eta azkena Bizkaiko campusean izango da, gaur.

EHUk urtero garatzen du Unibertsitatera Sartzeko Programa, unibertsitate aurreko ikasleek ahalik eta informazio gehien izan dezaten ikasketak hautatu aurretik. Unibertsitate orientaziorako azokak programa horren baitan daude, haren bigarren fasean, hain zuzen. Lehen fasean, unibertsitate aurreko ikasleei interesatzen zaizkien graduei buruzko jarduera praktikoak burutu ziren, eta, programari amaiera emateko, Ate Irekien Jardunaldiak egingo dira, martxoan. Horietan parte hartzeko, otsailaren 19etik 25era bitartean eman beharko da izena, unibertsitateko webgunean: www.ehu.eus/sou/jardunaldi-irekiak

Temas

Euskera

Contenido Patrocinado

Fotos

Vídeos