http://static.elcorreo.com/www/menu/img/zurekin-desktop.jpg

Díaz Olanoren obrarik ezezagunena Arabako Arte Eder Museoan aurkitzen da

Erakusketak artista gasteiztar honen lan esanguratsuenen zati handi bat biltzen du, bilduma pribatuetako margolanak dira batutako ugari, asko berriak, bibliografia aipamenei esker baino ez direnak ezagunak

I.AGOTE

Arabako Arte Eder Museoak Ignacio Díaz Olano, Pasión por la realidad erakusketa du ikusgai gaurtik aurrera. Erakusketak artista gasteiztar honen lan esanguratsuenen zati handi bat biltzen du, bilduma pribatuetako margolanak dira batutako ugari, asko berriak, bibliografia aipamenei esker baino ez direnak ezagunak. Ez dago zalantzarik, Ignazio Diaz Olano margolaria Arabako eta Euskal Herriko artista nabarmen eta aintzatetsienetako bat da. Izan ere, gure hirian galdetuko balitz nortzuk diren hiriko artista esanguratsuenak, lehenen artean aipatuko lukete. Arabako Arte Ederren Museoko aretoetan bada haren lanen erakusketa iraunkor bat, erakusketa askotarikoa eta handia, haren margolan nabarmenak biltzen dituena, hala nola, Jatetxea, Kalbarioko erromeriako itzulera eta Angelusa errezatzen soroan. Baina, margolariaren aldi baterako azken erakusketa handia 2001ean antolatu zen, duela hamasei urte; beraz, arabarren belaunaldi oso batek ez du haren lanaren ikuspegi osoago eta zabalago bat gozatzeko parada izan; eta urteak joan urteak etorri, badira laurogei urte hil zela (1937), haren oroitzapena lausotuz joan da eta estereotipo bihurtzen, azaldu du Euskera, Kultura eta Kirol saileko diputatua den Igone Martínez de Lunak.

Museoen helburua ahanzturari aurre egitea denez gero, historialari eta kritikari Santiago Arcedianok ikerlan handia egin du margolariaren ibilbide pertsonalari buruz. Lan horrek ezagunagoa egin du Diaz Olanoren irudia: nor izan zen Diaz Olano Gasteizen, XIX. mendeko azken erdialdean eta XX. mendeko lehen herenean, izan ziren nazio erakusketen esparruan eta haren eguneroko prestakuntza ibilbidean eta bizimoduan. Horren guztiaren emaitza agiri ugariko katalogo osoa eta artista gasteiztar eta margolarien maisu entzutetsuaren lan esanguratsuenen zati handi bat biltzen duen erakusketa hau. Ikerlan eta hautaketa horrek begirada sutsu bat eskainiko dio Diaz Olanokbere etapetan zehar izan zuen izpiritu sortzaileari. Erakusketa hau nekez ikusi ahal izango dugu berriz datozen urteetan. Nahiz eta Diaz Olanok paisaiak, natura hilak, biluziak, erlijiozkoak eta muralak ere landu zituen, erakusketa honek gizakiaren, batez ere emakumearen, irudiari eta gai herrikoi eta kostunbristei eman die lehentasuna.

Haren irakaspena gure historia hurbilena irudikatu duten margolari arabarren zenbait belaunaldirentzat ezinbesteko oinarri bihutu da. Haren eskoletan, nola Arka kaleko lantegi-estudioan hala Arte eta Lanbide Eskolan eta Bigarren Hezkuntzako Institutuan, ikasle ugari izan ziren. Prestatu ez ezik, artearen mundu nahasian lehen urratsak egiten ere lagundu zituen; eta, horretarako, bere arte ideia guztiak eta errealitaterako grina jakinarazi zizkien, hurbileko munduari buruzkoak aipatu zizkien, alegia, gertuko bizimodu eta izadiari buruzko alderdiak.

Fotos

Vídeos