http://static.elcorreo.com/www/menu/img/zurekin-desktop.jpg

Carreñoren eztanda isila

Pablo Carreño.
Pablo Carreño. / AFP

Tenislari espainiarrak Grand Slam bateko finalerdiak erdietsi ditu bere ibilbidean lehenengoz AEBko Irekian, eta Kevin Anderson garaitzeko aukerak badituela adierazi du

Iñigo Crespo
IÑIGO CRESPO

«Ez daukat tenisean jokatzeko dohain berezirik», adierazten du behin eta berriz Pablo Carreñok. Bere zuhurtasunarekin bete-betean egiten du bat esaldiak, baina pixkanaka eta isilpean, 26 urteko jokalari asturiarrak Grand Slam bateko finalerdiak erdietsi ditu bere ibilbidean lehenengoz. Kirol honetako analistek diotenez, tenislari espainiarren estiloa ez da zirkuituan aurkitu daitezkeen artean deigarriena. Bere aipamena eta adituen iritzia ikusita, ezinezkoa dirudi bere behin betiko eztanda argitzen duen erantzuna aurkitzea. Berak, aldiz, badauka bere errezeta, eta ziurtasunez esaten du Kevin Anderson menperatzeko aukerak izango dituela. Hori da, izan ere, AEBko Irekiko finala jokatzeko gainditu behar duen azken oztopoa.

Set bat ere ez du galdu Carreñok New Yorkeko txapelketa handian, eta Schwartzman, Shapovalov eta Mahut bezalako jokalariak utzi ditu bidean, denak hutsean. Gainera, final-laurdenetan garaipena lortu zuenean, segituan egin zioten betiko galdera. «Nor duzu nahiago, Querrey ala Anderson?». Eta berak, apaltasunez erantzun bazuen ere, hegoafrikarraren estiloa mesedegarria zela adierazi zuen. AEBko Irekia hasi zenetik, Asturiasko tenislariak izan dituen arerioak –Anderson barne– ATPko rankingean bere izenaren azpitik agertzen dira eta, beraz, badauka finalera iristeko sekulako parada.

Halere, badirudi Andersonek bere sake ikusgarria berreskuratu duela. Querreyren aurkako partidan, izan ere, 'ace' gehiago bildu zituen, estatubatuarraren arma nagusia hori bada ere. Azken bi urteotan goreneko maila mantentzea ezinezkoa izan bazaio ere, Andersonen tenisa arriskutsuagoa da gaur, egunotako garaipenek konfidantza izugarria eman baitiote. Baina Carreñok badaki hegoafrikarraren kolpeak ez direla hain beldurgarriak, eta tanto luzeei etekin handia atera diezaiekeela. Horiek dira, beraz, bere lehenengo final handira iristeko argudio nagusiak.

Baliteke Espainia mailan Rafa Nadalen mitoa inork ez berdintzea, eta hala adierazten dute tenislariek beroiek. Carreño bezalako kirolarientzat, aldiz, noizbehinka zerua laztantzeak balio neurtezina dauka.

Fotos

Vídeos