http://static.elcorreo.com/www/menu/img/zurekin-desktop.jpg

Bizkar osasuntsua izaten laguntzeko bigarren tailerra eskainiko du Arrigorriagak

Emakumeen Osasunaren aldeko Nazioarteko Ekintza Egunean egingo da, eta xede izango du gorputzeko zati horrekin lotura duten gaitzei aurrea hartzen laguntzea

Ezagutza txikia dago emakumeen osasunari eta gaur egun dituzten askotariko beharrei buruz. Hori dela eta, oraindik ere garrantzitsua da haien osasunarekin lotutako jarduketak egitea. Hori ikusita, Arrigorriagako Udalak, Berdintasun sailaren bidez, Emakumeen Osasunaren aldeko Ekintza Programa jarri zuen abian 2017an, maiatzaren 28aren harira.

Urtebetez martxan egon ondoren, Programak aurrera jarraitzen du eta 2018an gai berriei helduko die, eta iaz herritarren aldetik eskari handiena izan zuten tailerrekin ere jarraituko du. Horren adibide da Bizkar osasuntsua izaten laguntzeko tailerra, 6 ordukoa.

Tailer horren helburua da bizkarreko, zerbikaletako eta dortsaletako minak, ziatika, lunbalgiak eta halakoak sendatzeko gakoak eta metodoak ematea; izan ere, min horiek emakumeei eragiten diete neurri handi batean.

Horretarako, lehenik eta behin saio teoriko-praktiko bat egingo da ekainaren 6an, parte-hartzaileen gorputz-ezagutza eta -kontzientzia areagotzeko. Zehazki, bizkarrak duen forma eta funtzionamendua azalduko dira, eta zenbait aholku eman: nola eseri, nola makurtu, nola egon zutik eta nola ibili.

Beranduago hiru saio praktiko egingo dira, ekainaren 13an, 20an eta 27an. Parte-hartzaileek saio guztien ordutegia aukeratu ahal izango dute: goizez, 9:30etik 11:00etara; edo arratsaldez, 18:30etik 20:00etara. Goizeko saioak kiroldegian izango dira eta arratsaldekoak udaletxean (2. solairua).

Parte hartzeko, izena eman behar da Herritarren Arretarako Zerbitzuan, maiatzaren 18tik 25era, biak barne. Ekimenaren antolatzaileek azpimarratu dutenez, prestakuntza-saio hauen bidez Udalak erantzuna eman nahi dio herritarren eskaerari, gai hau aldian behin landuz, Berdintasun sailak antolatzen dituen beste tailer batzuekin egiten den moduan (autodefentsa feministaren tailerra edo gizarte-sustapenerako ikastaroa, kasurako).

Temas

Euskera

Contenido Patrocinado

Fotos

Vídeos