http://static.elcorreo.com/www/menu/img/zurekin-desktop.jpg

Bizkaiko Kultur Txartelaren 12.750 bonu jarriko dira gaur salgai

Kultur bonuak urtarrilaren 31ra arte aldatu ahalko dira

ELCORREO.COM

Bizkaiko Kultur Txartela kanpaina abian jarriko du gaur Aldundiak beste urtebetez kultur kontsumoa sustatzeko asmoz. Hala, 12.750 bonu eskuratu ahalko dira gaurtik hilaren 28ra bitartean. Kultur bonuak urtarrilaren 31ra arte aldatu ahalko dira, kultur produktuak erosteko garaian, nahiz museo, zuzeneko ikuskizun eta beste kultur produktu batzuen sarreretan, kanpainari atxikitako establezimendu sarean.

«Ekimen honekin, Bizkaiko Foru Aldundiak azken urteotako krisi ekonomikoak bereziki kaltetutako sektore bati lagundu nahi dio. Izan ere, sektore horretan BEZaren igoera kultur produktuen kontsumoarekin alderantziz proportzionala izan da. Arrazoi hori dela eta, administrazio publikoen laguntza sektorea sustatzeko funtsezko elementu da», adierazi zuen aurreko astean Euskara eta Kulturako diputatu Lorea Bilbaok.

2017-2018 denboraldiko Bizkaiko Kultur Txartela hiru mailatan banatuko da. A motako txartela 32 euroan erosi ahalko da eta gaztelaniako nahiz atzerriko hizkuntza bateko edozein kultur produktutan aldatzeko aukera izango da, esaterako, liburuak -testu liburuak edo profesionalak izan ezik-, musika edozein euskarritan eta zinema DVDan edo beste euskarriren batean.

Halaber, B motako txartela, 28 eurokoa, Bizkaian gaztelaniaz nahiz atzerriko hizkuntza batean antolatutako zuzeneko kultur ikuskizunetarako sarrerak erosteko izango da (musika, dantza, antzerkia eta zinema), bai eta museoak bisitatzeko ere. Azkenik, D motako txartela, 24 eurokoa, euskarazko produktuetarako eta euskarazko zuzeneko kultur ikuskizunetarako izango da. Programatik kanpo geratuko dira papergintzako artikuluak, informatika eta elektronikako ekipo, software eta kontsumigarriak, jokoak eta bideo jokoak.

Banku txartel bakoitzarekin maila bakoitzeko lau bonu erosi ahalko dira gehienez, eta bakoitzak 40 euroko balioa izango du, hau da, 8 eta 16 euro arteko deskontua lortuko da hautatutako kultur produktuaren arabera. Guztira, 3.750 bono eskuratu ahalko dira A mailan, 6.000 B mailan eta 3.000 D mailan.

Bizkaiko Foru Aldundiak 150.000 euro erabiliko ditu ekimen honetarako, eta Kutxabanken babesa jasoko du, BBKren orotarako kutxazainetan erosi ahalko baitira. Cecobi Bizkaiko merkatarien elkarteak ere babesten du kanpainak.

Temas

Euskera

Contenido Patrocinado

Fotos

Vídeos