http://static.elcorreo.com/www/menu/img/zurekin-desktop.jpg

Barakaldok baiezkoa eman die hileta zibilei

Ospakizunak ezin izango dira hildakoen gorpua bertan dela, baina onartuko da errauts-kutxak erabiltzea

ELCORREO

Barakaldon hileta zibilak ospatu ahal izango dira. Hala onartu zuen Udalak duela egun gutxi batzuk. EH Bilduk proposatu zuen araudia eta, horren ondorioz, herritarren ospakizun ez-erlijiosoak egiteko aukera izango dute hildakoei agur esateko.

Araudia oposizioko alderdiekin adostu da; ohi bezala, hamabost egun izan dituzte gobernu-taldeak aurkeztutako zirriborroa aztertzeko, eta, gero, proposamenak egin dituzte zirriborro horri gehitzeko.

Barakaldoko hileta zibilak ezin izango dira egin hildakoaren gorpua bertan dela, baina onartuko da errauts- edo anfora-kutxak erabiltzea.

Eskaerak ekitaldia baino 24 ordu lehenago egin ahalko dira; horretarako, Udalak emandako dokumentu bat bete beharko da, edo, Gorka Zubiaurre Alkatetza eta Herritarren Parte-hartze Arloko zinegotziak azaldu duen bezala, «eskaerak online egin ahal izango dira eguneko eta gaueko edozein ordutan, udal-webgunean prestatuko dugun atal berezi batean».

Udala arduratuko da ospakizun bakoitzean behar diren elementuak erabiltzaileen esku jartzeaz: altzariak, soinuzko materiala, ikus-entzunezkoa... Udal-zerbitzu hau Barakaldon jaio eta erroldatutako pertsona guztiek erabili ahalko dute, baita bizitzan zehar udalerriarekin lotura estua (pertsonala, profesionala, soziala) izan dutenek ere.

Gerora erabakiko da zer udal-espaziotan egingo diren omenaldiak: udal-hilerrian, Integrazio Sozialerako Zentroan, Lasesarre kiroldegian, eta Clara Campoamor eta Gurutzeta kultura-etxeetan. Prezioak Tasen eta Espazio Publikoen hurrengo ordenantzan erabakiko dira.

«Eskerrak eman nahi dizkiegu ordenantza aurrera eramateko ekarpenak egiteagatik eta Barakaldoko herritarrei zerbitzu berri bat ematen laguntzeagatik», adierazi du Zubiaurrek.

Fotos

Vídeos