http://static.elcorreo.com/www/menu/img/zurekin-desktop.jpg

«Balantze positiboa» Mercabilbaon, lehen seihilekoan 131.238 tona merkaturatu ostean

Langile bat, Mercabilbaon. / L.A. Gómez

Produktu guztien artetik, 117.749 tona frutak eta ortuariak izan dira, eta 13.489 tona arraina

ELCORREO.COM

Mercabilbao sozietate publikoa merkaturatutako 131.238 tonara heldu da 2017ko urtarriletik ekainera bitartean eta ekitaldiaren lehen erdiaren «balantze positiboa» egin du. Merkaturatutako produktu guztien artetik, 117.749 tona frutak eta ortuariak izan dira, eta 13.489 tona arraina, horiek baitira Basaurin kokaturik dagoen elikagai unitatearen hiru merkatu nagusiak.

Horrela, Mercabilbaoren arduradunak «zoriontsu» agertu dira urteko lehen erdiak utzi dituen zifrekin eta gorako joerarekin. Izan ere, Mercabilbaok merkaturatutako 248.863 tonako datu historikoarekin itxi zuen 2016. urtea.

Sektoreka, frutena eta ortuariena izan da beste behin salmenta bolumen handiena eragin duena, urtarriletik ekainera 117.749 tona merkaturatu baititu. Azpimarragarria da madaria eta melokotoia izan direla «produktu izarrak» urteko lehen erdian, merkaturatutako 3.489 eta 3.283 tonarekin, hurrenez hurren. Horien ondoren, oso gertu, gerezia (2.579 tona) eta nektarina (2.366 tona) izan dira, eta jarraian, meloia (1.630 tona), arbeletxekoa (1.527 tona), angurria (1.276 tona), paraguaioa (1.129 tona), okarana (569 tona), mahatsa (511 tona) eta uztapikua (64 Tm).

Arrainaren sektoreari dagokionez, urteko lehen seihilekoan 13.489 tona merkaturatu dira. Hegaluzearen salmenta datuak nabarmendu dira, arrantzaldiaren erdian 263 tona lortu baitira. Legatza (1.171 tona), antxoa (1.081 tona) eta txitxarroa (1.044 tona) izan dira gehien saldu diren arrainak, eta horien ondoren antxeta (918 tona), komatula (589 tona) eta izokina (528 tona) datoz, eta gero kopuruari dagokionez garrantzi gutxiagoko hainbat arrain, besteak beste, sardina, merlenka, berdela edo itsas zapoa.

Etengabeko hazkundea

Mercabilbaoko arduradunek nabarmendu dutenez, sozietate publikoak gorako joerarekin aurrera jarraitzen du. Horrela, iazko ekitaldian 248.863 tona merkaturatu zituen guztira, «erreferente ekonomiko gisa jartzen duen datu historikoa».

Horrela, azken urteetako etengabeko hazkundea finkatu dela azpimarratu dute. «Merkatua %100ean okupatuta dago, eta ordezkatzen duen eredu arrakastatsua finkatzeko erabateko konpromisoa erakusten du, etengabeko berrasmakuntza eta eraldaketa prozesuan, kalitatezko produktuen kontsumitzaileen eskariei erantzuteko gai izateko», adierazi dute.

Mercabilbaok zerga ondorengo 669.224 euroko irabaziak izan zituen 2016an. «Kopuru hori finantzaketa iturri garrantzitsua da etorkizunean jarduerari eutsi ahal izateko gauzatu behar diren inbertsioetarako», azaldu dute.

Jarduera hori, Mercabilbaon lan egiten duten pertsona guztien lanari esker da posible, hau da, operadore, jarduera osagarrien gune, merkataritza gune eta bulegoei esker. 13 hektareako azaleran ehun enpresa baino gehiago ari dira, eta 1.000 pertsona baino gehiagok egiten dute lan. 2016an ia 677.000 ibilgailu hartu zituen, 3.000 sarrera inguru egunean, batez beste.

Temas

Euskera

Fotos

Vídeos