http://static.elcorreo.com/www/multimedia/201707/04/media/zabalik-logo-ec.jpg

Eta Aste Nagusian zer? 'MARIJAIAPP'

Gazte bat, telefonoa begiratzen.
Gazte bat, telefonoa begiratzen. / R. Gómez

Bilboko jaien inguruko informazioa euskaraz eta gaztelaniaz ematen duen aplikazioa sortu da

IZASKUN MOYANO

Hiritar batek Aste Nagusiko ekintza eta kontzertuei buruz mintzatzen den mugikorreko aplikazioa eratu du. Hau jaisten duten erabiltzaile orok jaiei buruz aritzen den emakumezko ahots bat entzuteko abagunea izango du.

Aplikazioak 'Aste Nagusia Bilbao' izena du eta mugikorraren erabiltzailearekin solasean dihardu. Zerbitzua dohain eskuratzeaz gain, ez darama inolako publizitaterik.

Emakumezko ahotsa duen laguntzaile birtuala 'Marijaiapp' deitu dute, «gizon eta emakumeenganako berdintasuna sustatzeko» asmoz. Hala adierazi du behintzat bere sortzailea izan den Igor Etxebarriak. Bilbotar gazteak sei urte daramatza mugikorrerako aplikazioen munduan murgilduta.

'Marijaiapp'-ek neska gazte «bilbotar, kosmopolita eta modernoa»- ri egiten dio erreferentzia. Aplikazioa irekitzerakoan, ahotsak ‘EZ DA EZ’ leloa nabarmenduko du nagusi; iaz asmatu zen eraso sexista gabeko jaien ereserkia, hain zuzen ere.

Aplikazioak jaietako egitarau ofiziala eskaintzen du egun zein kategoria ezberdinetan ordenatuta. Era berean, beharrezko telefono zenbakiak, ekitaldien kokalekuak, protagonista eta ekintzen inguruko azalpenak edota konpartsen mapak ahalbidetzen ditu.

Etxebarriak ekitaldi jakin bat bilatzeko aplikazioak duen erraztasuna azpimarratu nahi du «zuzenean MARIJAIAPPi norbere ahotsa erabiliz galdetuta». Horrez gain, eguraldiaren inguruko informazioa ere ematen du punta-puntako aplikazio berri honek.

Temas

Euskera

Fotos

Vídeos