http://static.elcorreo.com/www/menu/img/zurekin-desktop.jpg

Arabako Arte Ederren Museoak Unamunori buruzko bi lan utzi ditu Salamancako erakusketa baterako

Unamuno./
Unamuno.

Salamancako San Eloy aretoan egingo den 'Iconografía unamuniana 1880-2018' izeneko erakusketan Juan de Echevarríaren eta Daniel Vazquezen lan bana ikusgai izango dira

PAUL PICADO

Abuztura arte Arabako Arte Ederren Museoko bi lan egongo dira ikusgai Salamancako San Eloy aretoan egiten ari den 'Iconografía unamuniana 1880-2018' izeneko erakusketan. Besteak beste partikularrek, museoek era erakundeek utzitako idazlearen erretratuak ikus daitezke erakusketan. Erretratu horiek, Unamunoren garaiko margolariek egindakoak edo gaur egungo artistek bere irudian oinarrituz egindako eta argitaratu gabe dauden lanak dira.

Arte Ederren Museoak bere bildumako bi lan garrantzitsu utzi ditu erakusketa horretarako. Lehenengo lana, Bilboko Juan de Echevarría artistak (1875-1931) 1930. urtean egindako erretratua dugu, Unamuno Hendaian erbestean egon zen azken urtean egindakoa. Unamuno zahartuta agertzen da, eskuen artean paperezko orri bat duela, margolariak Unamuno lan egiten ari zen bitartean etengo balu bezala. Atzeko mahaian, liburu batzuen ondoan, Velazquezen Kristo famatuaren irudia dago, idazlearen lan poetiko ezagunenaren erreferentzia eginez.

Bigarren lana, Huelvako Daniel Vázquez Díaz artistak (1882-1969) egindakoa dugu. Lan egiten zuen mahaian agertzen da Unamuno eta 1930 eta 1936 urteen artekoa da, bere bizitzaren amaierakoa. Jadanik Salamancan zegoen eta 1936. urtean han bertan hil zen. Vázquez Díazek Alfontso XIII.aren erregealdiaren eta Bigarren Errepublikako pertsonaiarik garrantzitsuenen erretratuak egin zituen eta horien artean, zenbait alditan Unamunorena ere egin zuen. Bere lan horretan eserita agertzen da Unamuno, lan egiten zuen mahaian, zuriz dauden orri batzuekin, eta berriro ere liburu batzuen ondoan. Oso argi ikusten da bere begirada sarkorra, eta egilearen estiloari jarraituz, izaera hieratiko eta bolumetrikoa du, konposizioaz asko arduratuta.

Contenido Patrocinado

Fotos

Vídeos