http://static.elcorreo.com/www/menu/img/zurekin-desktop.jpg

«Akats larria da noizbait hasitako dieta osasuntsua egiteari uztea»

Gabriela Uriarte, Donostiako La Bretxa merkatuan./Michelena
Gabriela Uriarte, Donostiako La Bretxa merkatuan. / Michelena
Gabriela Uriarte - 'A bocados' saioko nutrizionista

Gabonetan jakiekin bapo jarri ostean, 'A bocados' saioa aurkezten duen Gabriela Uriarte nutrizionistak eguneroko elikadurara itzultzeko aholkuak eman ditu

IZASKUN MOYANO

Gabon Gaua, Eguberria, enpresako bazkaria, Gabon Zahar gaua, Urte Berria, Errege bezperako afaria eta soberakinak amaitzeko egunetan denetatik eta inolako neurririk hartu gabe irensten da mahai gainean jartzen den janari guztia. Famili giroan gurasoek hasierako plater gisa urdaiazpikoa, kroketak, entsalada eta itsaskia ekarri dituzte. Izebak plater nagusiak prestatu ditu; haragia eta arraina. Eta amonak, urtero bezala jakiok jaisteko sagar-konpota goxoa egin du. Guztia bukatu ostean etorri dira komeriak; aulkitik altxatu ezinean ibilitakoan, hain zuzen ere.

Elikaduran aditua den Gabriela Uriartek adierazi duen bezala, Gabonen ondorengo astean, «ez da beharrezkoa garbi jatea». Astean zehar denetatik janda, eta asteburuan mihiari berak gustukoen duena emanda nahikoa omen da. Izan ere, neguko jai hauen aurretik eramandako errutina osasuntsua izan bada, ez da inolako arazorik egongo egunerokotasun horretara itzultzeko. Baina ordura arte norbaiten jateko ohitura desorekatsua izan bada, «orain da era egokian bazkari eta afariak antolatzeko une bikaina». Uriartek elikadura orekatua sustatzen du Ander Gonzalez sukaldariarekin batera aurkezten duen 'A bocados' saioan, astelehenetik ostiralera (20.15ean) ETB-2n.

Bizitza osasuntsua eramateko %80a era orekatsuan jatean datza; eta %20a ariketa fisikoa egitean. Beraz, gimnasiora apuntatzea ez litzateke ideia txarra izango. Hala ere, kirola egitera ohituta egon ezean, ez da gomendagarria egun batetik bestera gorputza «birrintzea». Izan ere, lehendabizi oinez paseotxo luzeak ematea aholkatzen du diestistak. «Gorputza sasoi egonean jartzea, iraupen lasterketa moduko bat da». Uriartek astean bost egunetan pisuak altxatzen ditu entrenatzaile pertsonal baten laguntzarekin. Honek, hezurrak sendotu eta gorputzeko koipea kentzen laguntzen du. «Ariketa honekin, neskok muskuluak larregi garatuko ditugunaren ideia okerra dugu buruan; nik biziki animatzen ditut guztiak pisuak altxatzera», dio Donostiako nutrizionistak.

Nutrizioaren munduan ezjakintasun zabala dago. Izan ere, aurrekoa ez da gizartean gaizki ulertzen den baieztapen bakarra. Izan ere, «dieta egiteak ez du esan nahi gosea pasatu behar denik». Osasuntsu jatean dago koska. Beraz, akats larria izango omen litzateke hasitako dieta bat bukatzea. Kasu honetan, galdu ditugun kilo kopuruaren bikoitza irabazteko arriskua dago. Beraz, ezinbestekoa da denetatik eta era egokian jaten ikastea.

Honetarako, Harvardeko Unibertsitateak egunean zehar jan beharrekoa adierazteko baliokidetasun jakin batzuk garatu zituen plater bat erreferentzia gisa hartuta. Plateraren erdia, barazkiak izango behar dira; laurden bat, proteinak, arraina kasu: eta gainontzeko laurdena, batik bat kinoa bezalako ale integralak. Horrez gain, ezinbestekoa litzateke, nola ez, bi edo hiru fruitu pieza eta eskukada bat intxaur jatea. Aipatu beharra dago, hauek aholku orokorrak direla eta, ondoren norberak bere erara egokitu behar dituela, laguntza profesionala dela medio.

Osasuntsu bizitzeko ur asko edatea nahitaezkoa dela esaten dute. Baina Uriartek topiko hau ez dela guztiz egia adierazi du. Egunean litro eta erdi edatea aholkatzen duten arren, oso erlatiboa da pertsona bakoitzaren kasuan. Oso bizitza aktiboa daraman kirolariak, ez du zertan bulego batean lanean ordu asko pasatzen duen beste norbaitek edaten duen ur kantitate bera edango. Bestalde, jaten dituzten fruitu eta barazki kopurua ere kontuan izan behar da. Ondorioz, ez deshidratatzeko beste ur edatea izango litzateke erabaki onena.

«Astegunetan ez dut animaliarik jaten»

Gabriela Uriartek astean zehar egiten duen erosketetan ez dago arrain zein okelarentzat lekurik. Berak adierazi duen bezala, jasangarritasun arrazoia du motibo nagusia. Ikerketa batzuen arabera, ganadu industriak karbono dioxido kopuru handiak emititzen omen ditu ingurura, eta dietista planetaren biziraupenarekin oso kontzientziatuta dago. Dena den, ez du bere burua guztiz begetarianotzat hartzen; noizean behin arrain freskoa jatea gustatzen baitzaio. «Kontsumo murriztean datza, ez da aldaketa zorrotzik egin behar».

Contenido Patrocinado

Fotos

Vídeos