http://static.elcorreo.com/www/menu/img/zurekin-desktop.jpg

Aixerrota Boleibol Taldeak, Argia Ereiten Euskara sariduna

Azaroaren 30ean, ostegunean, jasoko du saria Faduran izango den ekitaldian

ELCORREO.COM

Getxo Aixerrota Boleibol Kirol Taldeak jasoko du 2017ko Argia Ereiten Euskara saria datorren ostegunean, azaroak 30, Fadurako batzar aretoan 20:00ean hasiko den ekitaldian. 1999an abian jarri zen emakumezkoen kirol taldeak argi eduki zuen bere jarduna euskaraz naturaltasun guztiarekin izan behar zela. Horregatik urte hauetan guztietan euskararen gizarte erabilera babestu, sustatu edo hedatzeko egindakoa aitortu eta goraipatu nahi izan dute kirol talde hau sariaren VIII. edizioa jasotzeko proposatu dutenek. Aurten sariak aldatu du itxura, fase berri bati hasiera emateko, eta Ibon Garagartza artista gazteak egindako ikurra izango da, forma paraleloz osatutako eskultura.

Aixerrota Boleibol Kirol Taldea 1999an sortu zen, institutuan nesken kirola indartzeko eskola ordutegitik kanpoko jarduera izan ondoren. Garai horretan institutuko irakaslea zen Alberto Olalde, ordutik hona kirol talde horretako presidentea eta entrenatzailea denak azaldu duenez, «hiru zutabe izan genituen kluba sortzerakoan. Lehenengoz, kirola, espezifikoki boleibola bultzatzea batez ere nesken artean, bigarrenez hori euskaraz egingo genuela gure hizkuntza delako, eta hirugarrenez, nazioartekotasuna, gu garena eta guk egiten duguna kanpora begira azaltzea, eta horregatik urteetan zehar egin ditugun elkartrukeak. Hori normaltasun osoz egin du Aixerrota taldeak, eta normaltasunez ere bultzatu du beti emakumeen kirola». Horretarako «instalaziorik hoberenak ditugu Faduran, ezin gara kejatu», gehitu du Olaldek.

Ehun bat jokalari daude maila desberdinetan

Aixerrota taldeak hasieratik hainbat talde izan ditu maila desberdinetan. Une honetan 100 bat jokalari daude maila desberdinetan, 8 urtetik hasita, eta batzuek 8-10 urte daramatzate jolasten. Horietariko bat da Maider Santxo. 9 urterekin hasi zen jolasten eta gaur egun Batxilergoko bigarren mailan dago. Jarraitzen du jolasten eta gainera duela hiru urtez geroztik entrenatzailea ere da. «Taldean txikitatik lagundu digute euskaraz egiten boleibolean eta guk jokalari moduan boleibola eta euskara lotu ditugu beti. Orain entrenatzaile moduan berdin, txikiei laguntzen saiatzen».

Pozik pista barruan eta kanpoan ere bai

Lorpenak

Urte hauetan sari ugari lortu ditu Aixerrotak, baina presidenteak garrantzi handiago ematen die bizi izandakoari. «Kirol emaitzekin, bidaiekin eta elkartrukeekin gozatu dute asko jokalariek. Asko ikasi dute, beste kultura batzuk ikusi eta ezagutu dituztelako. Pista barruan garrantzitsua izan da baina niretzat garrantzitsuagoa pistatik kanpo bizi izandakoa». Bidaiak, besteak beste, estatua, Frantzia, Holanda, Txekia eta Poloniara izan dira eta toki guztietara eraman dute euskara. Iritzi berekoa izan da Maider Santxo. Berak aitortu digunez, kirol ibilbidean nahiko emaitza onak lortu dituzte, baina «niri boleibolak eman didan gauzarik hoberena izan da bidaiatzea. Batzuek buruan irabaztea baino ez dute, baina guri buruan sartu digute esfortzua egin behar dugula gauzak lortzeko. Sari bat ez da bakarrik domina bat lortzea edo txapeldun izatea, saria da txapelketetara joan ahal izatea, kanpoko jendea ezagutzea, lagunak egitea...».

Euskara begiratzeko beste modu bat

Aixerrota Boleibol taldeko jokalariak eta entrenatzaileak sariarekin «pozik, indartuta eta animosoago ibiltzen gara. Ni pozik nago klubaren barruko egiturarekin eta Getxoko udalak beti eskaini digun laguntzarekin. Baikor naiz eta uste dut aurrera egingo dugula, gure nortasunean dagoelako», aitortu du Olaldek, eta amaitu du esaten, ez dutela saria bilatu baina «beti eskertzen da, poza eta esker ona, ezin dugu beste ezer aipatu».

Maider eta bere kideak ere oso pozik daude sariarekin. «Ezberdina izan da, talde osoari eman digutelako. Euskara begiratzeko beste modu bat da, hau da, euskara beste arlo batean, kirolean, gainera emakumeen kirolean erabiltzeagatik». Maiderrek beste gazte kirolariei eskatu die, hasieran agian apur bat zaila izan arren, euskara kirolarekin ere lotzeko, «euskara altxor bat delako eta kirola egiterakoan ere erabili behar dugulako».

Temas

Euskera

Contenido Patrocinado

Fotos

Vídeos