Gurasoek semealabei eskolako lanakaz laguntzeko, 'Aittamak' izenadun ikasmateriala aurkeztu eben atzo, Gernikako Aita Luis Villasante Udal Euskaltegian. Ekimenaren helburuak dira, batetik, «gurasoei alfabetatze bidean pauso sendoak emoten laguntzea edo dakiena indartzea»; eta bestetik, «seme-alabek etxera eroaten dabezan eskola-ariketetan laguntzeko oinarriak izatea», aitatu dabe herriko euskaltegiko arduradunek. 'Aittamak' ikasmateriala Lehen Hezkuntzako (LH) ikasleei zuzendutako dozena bat unitatez osotuta dago.
Guraso euskaldunentzako hezkuntza-gida moduko hori lantzeko, bestalde, ehun bat orduko ikastaroa antolatuko dabe, euskaltegian. Subertatu ezkero, baina, herriko ikastetxeetan bertan emoteko aukera be aztertuko dabe programaren sustatzaileek. «Taldea egiteko, gitxienez zortzi lagunek emon beharko dabe izena», jakinarazo dabe. Eskolok urriaren 4an hasi eta maiatzaren amaierara arte luzatuko dira, astean bi egunetan.
