Gernikako Udaleko Euskera Zerbitzuak jakitera emon dauanez, herriko profesionalen artean «gero eta euskera gehiago erabiltzen da». Izan be, igaz, bertoko 47 enpresariek bat egin eben 'Geure berbei euskeraz' izeneko hitzarmenagaz. Aurreko kanpainaren aldean, beraz, euskararen alde egiten daben profesionalen kopurua % 30 igo da. «2009an ahalegin berezia egin genuen profesionalen arloa proiektura erakartzeko eta ahaleginak fruituak emon dauz», zoriondu dira Udaleko Euskara saileko arduradunak.
Euskeraz jardutearen alde egin daben profesionalen artean, «hainbat arkitektura-estudio, aseguru-etxe, gestoria eta inmobiliarietako ugazaba-ugazabandre dagoz», zehaztu dabe. Merkataritzaren atalari jagokonez, bestalde, guztira 127 denda, taberna eta jatetxek emon dabe izena planaren hitzarmenkide izateko. Arlo honetan, barriz, parte-hartzearen kopuruak enpresetan baino nekezago egiten dau gora. Datuen arabera, 2009an, bederatzi merkatari-ostalarik sinatu eben akordioa; hau da aurreko urtean baino bost gehiago. Euskara Zerbitzuak bultzatuta, aurten be, aurrez aurreko bisitakaz jarraituko dau Udalak, Artez enpresagaz alkarlanean. Bisita horreetan, edozein negozioetan euskarak daukan balio erantsia azaltzen deutsie teknikariek enpresari, merkatari eta ostalariei.
