El Correo

Gernikako Arbolaren kimu bat landatuko dute Auschwitzen

Operazio berdina egin dute beste hainbat tokitan. Irudian, Muskiz.
Operazio berdina egin dute beste hainbat tokitan. Irudian, Muskiz.
  • Auschwitz eta Gernikaren arteko lokarria estutzea da helburua

Iñigo Urkullu Eusko Jaurlaritzako lehendakariak Gernikako Arbolaren kimu bat landatuko du Auschwitz-Birkenau kontzentrazio esparruaren ingurumarian, Polonian. Bidaia apirilaren 19 eta 20an egingo da, Auschwitz eta Gernikaren arteko lokarria estutzea helburutzat hartuta, Gernikako bonbardaketaren 80. urteurrenerako egun gutxi falta direnean.

Urkullurekin batera izango dira Jonan Fernandez Bizikidetza, Giza Eskubide eta Lankidetzako idazkari nagusia eta Marian Elorza Kanpo Harremanetarako idazkari nagusia, Jaurlaritzaren aldetik. Halaber, ana Otadui Bizkaiko Batzar Nagusietako presidentea ere egongo da, batzar taldeetako ordezkariekin batera. Aurreikusi da Euskadiko hainbat ikastetxetako gazteak ere bertan izatea, Europako Tradizio eta Kulturaren Aldeko Elkarteak sustatutako hezkuntza espedizioaren baitan.

Eusko Jaurlaritzak jakinarazi duenez, Gernikako Arbolaren kimua apirilaren 20an landatuko dute Zasole parkean, Auschwitz-Birkenau kontzentrazio esparruaren ingurumarian. Ekitaldi 'hunkigarria' izango da eta, bertan, ondoz ondo izango dira euskal eta poloniar kulturak. Urkullu Oswiecimeko Udaleko ordezkariekin, Malopolskako eskualdeko presidentearekin eta Auschwitz-Birkenau Museoaren arduradunekin bilduko da.

Bezperan, apirilaren 19an, euskal ordezkaritza batek Auschwitz I eta Auschwitz-Birkenauko kontzentrazio esparruak bisitatuko ditu. Bisita ofizialaren ondoren, euskal eta poloniar gazteen nazioarteko topaketa batera bertaratuko dira, eta bertan, Auchwitz-Birkenauko kontzentrazio eta deuseztatze esparruetatik bizirik ateratako Bogdan Bartnikowski izango da hizlari. Ekitaldi horretan, gainera, Euskadi eta, zehazki, Gernikako bonbardaketaren 80. urteurrena ere ekarriko dute gogora.

Recibe nuestras newsletters en tu email

Apúntate