El Correo

Urkulluk herritarren galderei erantzungo die sare sozialen bidez martxoaren 31n

Iñigo Urkullu.
Iñigo Urkullu. / Telepress
  • Galderak egiteko epea martxoaren 23ko 00:00ak arte izango da. Eta galderei botoa emateko epea, martxoaren 24tik martxoaren 28ko 16:00ak arte

ñigo Urkullu Eusko Jaurlaritzako herritarrek sare sozialen bidez egingo dizkioten galderei erantzungo die martxoaren 31n, #UrkulluTopaketa ekimenaren baitan. Herritarrek Twitter eta Facebook bidez planteatu ahal izango dituzte kezkatzen dituzten eta jarduera publikoarekin eta Jaurlaritzarekin zerikusia duten gaiak.

Urkulluk zuzeneko saioan erantzungo die galderei, eta Irekia guneak Youtuben duen kanalaren bitartez eta Facebook Live-ren bitartez ikusi ahal izango da. Irekiako lantaldeak abian jarritako ekimenaren helburua da euskal herritarren partehartzea sustatzea eta Jaurlaritzako kideekin elkarreragiteko aukera ematea, Lehendakaritzak jakinarazi duenez.

Prozesu parte hartzaile guztietan bezala, mekanismo batzuk zehaztu dira proposamenak edo galderak jasotzeko. #UrkulluTopaketa ekimenaren kasuan lau fase ezarri dira: herritarrek galderak egitea, herritarrek galderak baloratzea, herritarrek gehien baloratu dituzten 20 proposamenen aukeraketa eta, azkenik, Urkulluk zuzenean erantzutea. Era horretan, Jaurlaritzako lehendakariak herritarren boto gehien jaso dituzten 20 galderak erantzungo ditu.

Lehenengo 20 galderen artean egoteko behar besteko puntuazioa lortu ez dutelako zuzenean erantzuten ez diren galderak Irekia webgunearen bitartez erantzun eta argitaratuko dira, herritarrek Irekiaren gizarte sareen bidez ikusi ahal izan ditzaten.

#UrkulluTopaketa

Horrela, nahi duenak Twitter eta Facebook sare sozialen bidez parte hartu ahal izango du. Twitter bidez, herritarrek galdera egiteko txioak argitaratuko dituzte, #UrkulluTopaketa traola erabiliz. 'Gogokoak' marka duten galdera eta 'bertxioak' aukeratuko dira: puntu bat horietako ekintza bakoitzeko.

Halaber, Facebook bidez, herritarrek galdera egiteko, Irekiaren Facebook profilaren horman argitaratuko dute galdera #UrkulluTopaketa traola erabiliz, eta mezu horiek komentatuz joango dira argitaratzen ekimena zabaltzeko. 'Atsegin dut' gehien dituztenak aukeratuko dira: puntu bat horietako ekintza bakoitzeko.

Herritarrek galderak egiteko epea astelehen honetatik martxoaren 23ko 00:00ak arte izango da, eta galderei botoa emateko, martxoaren 24tik martxoaren 28ko 16:00ak arte. Herritarren boto gehien jaso dituzten 20 galderak hautatu eta Urkulluri aurkezteko eguna martxoaren 29a izango da, eta martxoaren 31n Urkulluk berak erantzungo ditu galderak jendaurrean Youtubeko eta Facebookeko zuzeneko saioan. Saioaren bideo osoa Irekian eta Irekiak Youtuben eta Facebooken dituen kanaletan argitaratuko da.

Recibe nuestras newsletters en tu email

Apúntate