El Correo

AEBetako muinera iritsi nahi du Euskadik

Iñigo Urkullu lehendakaria, hiru ahaldun nagusiekin.
Iñigo Urkullu lehendakaria, hiru ahaldun nagusiekin. / EFE
  • Washingtonen 2016an egingo den Smithsonian Folklive jaialdian izango da euskal kultura, Ipar Amerikako herriarekin zubiak sendotzeko asmoz

Bost urtetik behin Boisen ospatzen den Jaialdia aprobetxatuz, zubiak sendotu nahi ditu Euskadik AEBekin. Iñigo Urkullu eta Unai Rementeriaren bisitaldiek, besteak beste, Ipar Amerikako herriarekin zenbait hitzarmen eta lankidetza adostuko dituzte, bertako enpresekin proiektuak burutzeko. Izan ere, Bizkaiko ahaldun nagusiak eta Michael Mason Smithsonian Fundazioko Folklive Festival jaialdiaren zuzendariak bi erakundeen arteko hitzarmena sinatu dute, eta, horren bidez, euskal kultura gonbidatuta dago 2016. urtean Washingtonen egingo den Smithsonian Folklive Festival ekitaldira.

Hitzarmena Bizkaiko Foru Aldundiak sinatu badu ere, asmoa da Euskal Herriko gainerako lurralde eta erakundeetara zabaltzea. Rementeriaren ustez, hitzarmen honek "aukera ederra emango du Bizkaia eta Euskadi Amerikako Estatu Batuetako muinean kokatzeko, eta handik gero mundu osora zabaldu ahal izango da. "Aukeraz ondo baliatzen bagara, eta badut itxaropena egingo dugula, Smithsonian mugarria izan daiteke gure kulturarentzat eta atzerrian daukagun presentziarako, duela urte batzuk Guggenheim izan zen bezala", esan du ahaldun nagusiak. Horrez gain, hitzarmen hau sinatzea "urteko albiste garrantzitsuenetako bat" dela ziurtatu du, bai Bizkaiarentzat, bai Euskadirentzat.

Smithsonian Zentroaren Folklive Festival jaialdiko zuzendari Michael Masonek ere uste du hitzarmena "aukera ederra" dela "oso zaharra izanik etorkizunera begira dagoen herri modernoa aurkezteko". Masonek esan du bere erakundeak Bizkaiarekiko eta Euskadirekiko daukan interesak oinarri historikoak dauzkala baina, aldi berean, gaurko errealitateari ere begiratzen diola, "erakutsi nahi baitugu kultura ondarea ez dela iraganeko kontua eta gaur egun ere bizirik dagoela".

Smithsonian Fundazioaren ordezkariak azaldu du euskara oso interesgarria gertatuko dela ekitaldira biltzen direnentzat. Ekitaldia hamar egunekoa izango da eta 2016ko ekainaren amaieran eta uztailaren hasieran egingo da (datak ez dira zehaztu oraindik). Masonek esan du Bizkaiaren eta bere erakundearen arteko lankidetzaren lehen urratsa izango dela. "Aurrera egingo dugu elkarrekin. Gure lankidetza urrunago helduko da", iragarri du.

Smithsonian Folklive Festival munduan egiten diren kultura ekitaldi handienetakoa da. AEBetako hiriburuko National Mall gunean egiten da eta milioi bat pertsona bildu ohi ditu; mundu osoan zehar 40 bat milioi pertsonek jarraitzen dute. Hitzarmena sinatzean Bizkaiko ahaldun nagusiak esan duen bezala, ekitaldi hau "oso garrantzitsua" da, eta, daukan eragina kontuan izanik, "aukera paregabea da mundu osoak ikus dezan Bizkaian denetariko aukerak daudela, kulturaren arloan, prestakuntzan, ekonomian zein gizartean".

Hitzarmenak Bizkaiko Foru Aldundiak bere gobernu eremu guztietan kanpo ekintzarekin daukan konpromisoa berretsi du. "Konpromisoan emandako hitza betetzen ari gara. Munduko aukeraguneak lotuta egotea ekonomiaz harago zabaltzen da; aitzitik, kulturaren arloan ere nazioarteko lotura interesgarriak ezar daitezke, eta Smithsonian Folklive Festival horren lekuko argia da. Uste dut ekitaldi hau gure hizkuntza, euskara, indartuko duen pizgarria izango dela, gure sortzaileen ospea nazioartean zabaltzen lagunduko duela, eta Bizkaia kokatuko duela kulturarekin konpromisoa sendoa duten lurralde ekintzaileen artean", azaldu du.

Munduko mapan azaldu

Rementeriak "munduko mapan nahi du ipini Bizkaia", eta langintza horretarako "aliatu ona" da Smithsonian Fundazioa, munduko museo erakunderik garrantzitsuena (urtean 30 milioi bisitari baino gehiago joaten dira bere 19 museoetara) eta goi mailako erreferentzia hezkuntzan eta ikerketan.

Smithsonian erakundearen garrantziaz Bilboko Arte Eder Museoko zuzendari Javier Viarrek esan duenez, "puntako erakundea da hezkuntzaren eta ikerketaren arloetan, ospe gorenekoa. Bederatzi ikerketa zentroz gainera denetariko 19 museo dauzka: Afrikako artea, afroamerikarren historia eta kultura, AEBetako artea, Ipar Amerikako indiarren artea, historia naturala... Erakundearen hedadura ulertzen lagundu dezakeen datua ematearren, parke zoologikoa ere badauka. Administrazioa eta finantzabideak Ameriketako Estatu Batuen Gobernuaren esku daude".

Bestalde, Andres Urrutia euskaltzainburuak ere azpimarratu du "zer garrantzitsua" den arlo guztietan Bizkaiko Foru Aldundiak lankidetzan jardutea Smithsonian bezalako erakundeekin. "Izan ere, erakunde horrek eskarmentu handia dauka zientzietan, eta ospe handia lortu du gainera, eta ezagutzak gizarteratzeko eta nazioartean zabaltzeko eratu duen modua eredugarria izan daiteke denontzat, are gehiago, eredugarria izan behar da. Euskaltzaindiak bat egiten du ekimenarekin eta Bizkaiko Foru Aldundia adoretu nahi du horrelako lankidetza gehiago ezartzera", esan du.

Washingtongo jardunaldia amaitzeko Unai Rementeria euskal jatorriko John Garamendi kongresukide demokratarekin bildu da. Ahaldun nagusiak esan dio "oso garrantzitsua" izango dela euskal diasporak buru-belarri parte hartzea Smithsonian Folklive Festival ekitaldia arrakastatsua izan dadin.