San Jose eta Mazo izango dira Kuxkuxeroak saioan Gernikan

IRATXE ASTUI GERNIKA-LUMO.

Gazteen euskeraren erabileran eragin gura dauen Kuxkuxeroak bigarren saioa aurreikusita dago datorren asterako, Gernikan. Oraingo honetan, Mikel San Jose, futbolaria, agertuko da herriko Gaztelekuan, datorren eguaztenean, hilak 17, 19.00etan. Zapatua 20an, bestalde, 'Go!azen' telesaileko Nerea Mazo, 'Nikole', egongo da gazteen galderak erantzuteko prest, leku eta ordu berean.

Kuxkuxeroak egitasmoak gazteen artean euskararen erabilira areagotu gura dau erreferentzialtasuna landuz eta eredu izan daitekezen pertsonekin galdera librean ibiliz, «naturaltasunez eta euskaraz», azaldu dabe saioen antolatzaileek. Programa, bereziki 12-16 urte arteko gazteei zuzendu arren, gainontzeko gazteei be zabalik dago.

«Hedabidetan agertzen diren pertsonaiak -aktoreak, musikariak, kirolariak- gazteentzat eredu izanik, euren portaerak kopiatzeko ohitura ei daukez», ziurtatu dabe. Hori holan izanda, Kuxkuxeroak egitasmoak bitarteko eta planteamendu horietako bat izan gura dau. Gazteek aldez aurretik, www.kuxkuxeroak.eus webgunearen bidez pertsonaia horrei egin gura deutsezan galderak bidaltzeko aukera idaukate.

Contenido Patrocinado

Fotos

Vídeos