Eskola jazarpenari aurrea hartzeko tailerra antolatu dabe Bermeoko bibliotekan

Ekimena 6 eta 8 urte bitarteko umeei zuzenduta dago eta sei saioetan garatuko da, parte-hartzea doan dala

IRATXE ASTUIBermeo

Kontakizunen bidez balioak lantzeko eta eskola jazarpen edo ‘bulling’ egoerak prebenitzeko tailerra antolatu dabe, Joxe Miel Barandiaran Bermeoko Udal Liburutegian. 6 eta 8 urtera arteko umeei zuzenduta dago ekimena eta sei saioetan garatuko da. Lehenengo hitzordua, izan be, martiaren 1ean izango da. Hurrengo saioak 8, 15 eta 22an eta apirilaren 12 eta 19an –eguenak– egingo dira, 18.30ean hasita.

Tailerraren dinamizatzailea Nuria Dehesa haur hezitzailea izango da. «Parte-hartzea dohainik da eta, gehienez, taldean 10 ume egongo dira», azaldu dabe Bermeoko bibliotekako arduradunek. Interesa dauken pertsonek bertan emon beharko dabe izena, aurretiz.

«Eskola jazarpenarekin amaitzeko heziketa ezinbestekoa da, balio-heziketa on batek arazo horreri aurre egiten lagunduko deuskulako, eta baita gaur egungo umeak biharko heldu osasuntsu eta zoriontsu izaten be», adierazi eban Dehesak, eskola jazarpena edo bullyinga arazo bat dala eskoletan azpimarratzeko. Udaleko liburutegian eskainiko dauen tailerran, bestalde, «ipuinen bidez errespetua, elkartasuna, ausardia, autoestimua eta enpatia balioak sustatzen saiatuko gara, eskola jazarpenari aurrea hartzen laguntzeko», aurreratu dau haur hezitazaileak.

Saio bakotxan balio bat edo bi landuko dira, eta, horretarako, testu batzuk irakurriko dabez umeak; nobelak, ipuinak, olerkiak eta igarkizunak tartean. «Irakurmen bakotxaren ostean, irakurritakoa aztertuko dogu. Besteak beste, alkarregaz komentatuko dogu, irakurritakoa gustatu jaken edo ez eta zergatik, zein izan dan pertsonaia nagusiaren jokaera, zelan konpontzen dira gatazkak ipuinean, agertzen diren baloreak, zer transmititu deutsen istorioak, zelan sentitzen diran pertsonaiak eta baita zelan sentitu diran eurek entzuten eban bitartean be», esan dau Dehesak.

Horrez gain, saio bakotxan, partehartzaileek ekintza bat prestatuko dabe saioan landu gura diran baloreei lotuta. «Klasearen amaieran komentatuko dabe zein izan dan gehien gustatu zaien testua eta zergatik».

Temas

Bermeo

Contenido Patrocinado

Fotos

Vídeos