Azoka berezia eta sukalkia hartuko dauz bihar Gernikako Euskal Jaiak

Baserritar jantzita kaleratzen dira herritarrak Euskal Jaian. :: E. C./
Baserritar jantzita kaleratzen dira herritarrak Euskal Jaian. :: E. C.

IRATXE ASTUI GERNIKA-LUMO.

Bihar ospatuko dabe gernikarrek, bete urte batez, euren Euskal Jaia. Hamargarren edizioa beteko dauan jaieguna 12.00etan hasiko da, txupinazoagaz eta Merkurio iturriaren inguruan zabalduko dan sagardao kupelagaz. «Intxaur eskaintza eta taloak be egingo doguz», zehaztu dabe Jai Batzordekoek. Bitartean, merkatu plazak azoka berezia hartuko dau. Oraingo honetan sukalkiari eta ardoari zuzenduta egongo da saioa.

Euskal Jaiaren giroa berotzeko, bestalde, Euskal Herriko Kantagunea, Elai Alai Dantza Taldea, Segundo Olaeta Musika Eskolako musikariak, Gazteak-eko txistulariak eta Busturialdeko Gaiteruak ibiliko dira kalerik kale herri bazkariaren ordua heldu arte.

Erregelak ba bai

Herri kirolen erakustaldia 13.00etan hasiko da, Artekalean. Aurtengoan eta nobedade moduan, ardi-larre aldaketa edo transhumantzia erakustaldia be izango da, Gernikako Euskal Jaian. Sasoi batean ganadua batetik bestera zelan eroaten eben ikusi ahal izango da 13.30etatik aurrera, Saraspetik hasita eta Artekalearaino. Herriko dantza taldeak, urtero legez, Erregelak dantzatuko dauz, Merkurio inguruan, 14.00etan.

«Herri bazkarian parte hartzeko, bestalde, txartelak salgai dagoz Turismo bulegoan eta ohiko tabernetan», gogorarazi dabez jaiaren antolatzaileek. Umeen txokoa goiz eta arratsaldez zabalik egongo da Merkatu plazan, UREk antolatuta. Dunbots txaranga kalerik kale ibiliko da, 19.30etatik aurrera, eta Eingo taldeagaz kantan eta dantzan egiteko aukera izango da ordu berean.

Gaueko erromeria Lehian taldearen eskutik izango da, 21:30ean, Pasealekuan.

Contenido Patrocinado

Fotos

Vídeos