Ia 2.000 euro arteko dirulaguntzak jaso ahal dabez ekintzaileek Bermeon

IRATXE ASTUI BERMEO.

Bermeo, Mundaka eta Sukarrietako Behargintzak enpresa barriak sortu gura dabezen ekintzaileentzat aholkularitza zerbitzua eta diru-laguntzak bideratuko dauz; izan be, bere helburuetariko bat da enpresak sortzeko eta sendotzeko prestakuntza eskaintzea. Holan, Lanbide Euskal Enplegu Zerbitzuko ekintzaileentzako laguntzen deialdiaren barruan, ekintzaileentzako diru-laguntzak bideratuko dauz Bermeoko zentruak eta izena emoteko epea otsailaren 12ra arte zabalik mantenduko da.

«Izena emoten dabenen artean, aukeraketa prozesu bat zabalduko da eta aukeratuek hiru hilabeteko aholkularitza-prozesuan parte hartuko dabe», azaldu dabe Behargintzako arduradunek. Tutoretzak, bestalde, otsailaren 15ean hasiko dira. Ekintzaileak Euskal Herrian erroldatuta egon beharko dira eta baita berton bizi be. Horrez gainera, langabetuak izan behar dira eta Lanbiden enplegu eskatzaile moduan izena emonda egon behar dira.

Enpresa-ideia garatu gura dabenek «ezin izan dira aurretik Ekonomia Jardueren Zergan edo Lanbide Autonomoen Erregimen Berezian alta emonda egon», ohartarazo dabe, beste alde batetik. Enpresa-jarduera barria martxan ipini gura dabenek barriz, enpresa barriaren helbide soziala eta fiskala Euskal Autonomia Erkidegoan jarri beharko dabe.

Diru-laguntzei jagokenez, Bermeoko Udalak ordainduko dauz eta 1.000 eta 1.950 euro bitartekoak izango dira. Laguntza jasotzerakoan, bereizketa bat egingo da, ideia garatzen daben ekintzaileek zenbateko osoa jasoko dabe; eta, bestetik, enpresa martxan jartzen dabenek, hasieran laguntzaren erdia jasoko dabe eta gainerakoa, Jarduera Ekonomikoen Gaineko Zergan alta emon eta gero.

Temas

Bermeo

Contenido Patrocinado

Fotos

Vídeos