Bizkaiak iaz baino %12,5 gehiago bildu du zerga bidez maiatza arte

Bizkaian zerga itunduen bidez 2.914,5 milioi euro bildu dira urtarriletik maiatzera, hau da, iaz baino %12,5 gehiago. 2016ko aldi berean 2.590,4 milioi euro bildu ziren, aurten baino 324,1 milioi euro gutxiago, Bizkaiko Aldundiak emandako datuen arabera.

Horrela, urteko lehen bost hilabeteetan bildutako zenbatekotik, 1.198 milioi euro zuzeneko zergari dagozkio, eta %26,8 igo da. Atal horretan, lan atxikipenak %2,9 igo dira, eta PFEZren bilketa %4,9raino igo da.

Sozietateen gaineko Zergaren bilketak ere gora egin du 2016ko zifra negatiboekin erkatuta, eta 124,1 milioi euro bildu dira, hots, iaz baino 157,2 milioi euro gehiago. Gainerako zuzeneko zergetan ere diru bilketa handitu egin da, bai ez egoiliarren errentaren gaineko zergan, bai oinordetzen eta dohaintzen gaineko zergan.

Zuzeneko zergari dagokionez, 2017an 1.419,3 milioi euro bildu dira, hau da, iaz baino %1,7 gehiago (23,6 milioi gehiago). Zuzeneko zergaren kontzeptu nagusien artean, BEZaren bilketak %1,2 puntu behera egin du, eta 1.093,6 milioi euroan dago. Bestalde, zerga berezien artean, hidrokarburoengatik bildutako 338,4 milioi euroak nabarmendu dira, %5,7 igo baitira. Gainerako zenbatekoek (tabako lanak, elektrizitatea, alkoholak eta eratorritako edariak), aldiz, bilakaera negatiboa izaten jarraitu dute.

Foru aldundiek BEZan eta berezietan egindako barne doikuntzek ekarri dute Bizkaiak 268,8 milioi euro ordaindu beharra, eta horietatik 198,5 milioi Gipuzkoari ordaindu zaizkio, eta 70,3 milioi Arabari. Horrenbestez, kudeaketa propioko zerga itunduen bidezko diru bilketa %12 igo da 2016arekin alderatuta, eta 2.646,4 milioi eurora iritsi da.

Bestalde, Estatuarekiko doikuntzak %18,3 igo dira, maiatzean aurreko ekitaldietatik zeuden zenbatekoen likidazioa kontabilizatu baita, 2011ko ekitalditik 2016ko ekitaldira Kupoetan egondako diferentziengatik lortutako hitzarmenen bitartez. Gauzak horrela, 126,6 milioi euroko diru sarrera ekarri dute.

• Temas
• Zurekin Bizkaia
• Zurekin Bizkaia destacadas