El Correo

%0,3a

Niretzat harrigarriak diren zenbait albistek oso oihartzun xumea lortzen dute maiz. Esaterako, aho bete hortz geratu nintzen eguzki sistema berri bat aurkitu egin dela jakin nuenean. Lurraren neurriko zazpi planeta daudela hor kanpoan azaldu ziguten. Zazpi mundu berri, eguzkia ez den beste izar baten orbitan. Gainera, baliteke bizitza egotea; beraz, estralurtarrak ezagutzeko aukera izango genuke, azkenik. Laburbilduz, albiste zoragarria izan bada ere, ahaztuta daukagu dagoeneko. Aldiz, aldez aurretik hainbeste mamirik ez duten albiste batzuek luzaro jarraitzen dute boladaka lehen orrialdeko berria izaten. Burura datorkit, adibidez, RGIarekin lotuta dauden hainbat kontu. Urteak daramatzagu herritarrok gai horri buruz mintzatzen, nor bere usteak barreiatzen, zurrumurruak zabaltzen. Gai delikatua da, ondo asko dakit.

Aste honetan, RGIaren iruzurra %0,3koa dela jakinarazi digu Lanbidek. Ez dirudi oso datu kezkagarria, egia esan. Maulak murriztu dira azken urteotan. 135.000 laguntza-eskaera berraztertu dituzte eta 392 kasutan detektatu dute engainatzeko nahia. Hortaz, RGIaren iruzurra ez da geure ekonomia arriskuan jartzen duen ezer. Hala eta guztiz ere, gai honi buruz gehiago hitz egingo dugun susmoa daukat.

Beharbada, estralurtarrak albiste izango lirateke geure planetara etorriko balira RGIa eskatzera. Hori, Hollywooden martzianoei buruz egin dituzten hurbilketa apokaliptikoak baino beldurgarriagoa suertatuko litzaiguke. Estralurtarrek Lanbideko langileak bahituko lituzkete irudikatzen ari naizen pelikulan, eta bulego guztien kontrola hartuko lukete. Herritarrok ihes egiten saiatuko ginateke eta pilaketa itzelak osatuko lirateke errepideetan. Horrela estralurtarrak notizia bilakatuko ziren.

Estralurtarrak... Nolakoak izango diren? Euren planetetan ere Enrique Iglesias bat edukiko dute udako gauak trabesteko? Polemika arraroetan nahastuta ibiliko dira egunero? Oraingoz, badirudi estralurtarren ajeek ez gaituztela gehiegi larritzen. Guk geure kezkak dauzkagu, eta ez dugu estralurtarrik behar kezka martziano samarrak izateko.

Recibe nuestras newsletters en tu email

Apúntate