El Correo

200 ikasle izango dira Esperientziaren I. Foroan

  • Ostegun honetan ospatuko da Bizkaiko Zientzia eta Teknologia Parkean

DBHko 4. Mailako 200 ikasle bilduko dituzte gaur Esperientziaren I. Foroan, haiengan teknologiarekiko interesa pizteko, teknologia haientzat erakargarria izan dadin, eta LH enplegagarritasun maila handiko lan aukera gisa sustatzeko, batik bat industriarekin lortutako adarretan.

Ekimenari esker, gazteek Bizkaiko Zientzia eta Teknologia Parkean dauden enpresen errealitateak ezagutuko dituzte, eta ikusiko dute zein diren gehien behar diren profilak, zer jarrera behar diren eta zer erronka aurkituko dituzten, ahalik eta prestakuntzarik osoena lortzeko, jardunaldiaren antolatzaileek azaldu dutenez.

Izan ere, antolatzaileen arabera, «zientziarako bokazioak falta dira euskal gazteen artean». «Gabezia hori oso kezkagarria da Euskadiko industriaren etorkizunera begira, eta ugazaben elkarteek zein Eusko Jaurlaritzak behin baino gehiagotan mahaigaineratu dute. Euskadiko Lanbide Heziketak arazo hori desagerrarazi nahi du, edo, behintzat, txikiagotu, euskal industrian teknikari kualifikatuak behar direla ahaztu gabe», adierazi dute.

Bisitak zenbait enpresatara

Horrela, DBHko 4. mailako 200 ikasle (15 eta 16 urtekoak) Bizkaiko Zientzia eta Teknologia Parkean bilduko dira ostegunean. Goizeko 10:00etan hasiko da jardunaldia, entzunaretoan, Zientzia eta Teknologia Parkearen eta hango enpresen jarduerari buruzko azalpen laburrarekin. Cristina Andres Bizkaiko Zientzia eta Teknologia Parkeko Berrikuntzako zuzendariak eta Nicolas Sagarzazu Eusko Jaurlaritzako LH eta Ikaskuntzako zuzendariak inauguratuko dute jardunaldia.

Inaugurazioa egin eta gero, mahai inguru bat izango da. Bertan, Lanbide Heziketako zikloa amaitu duten edo oraindik etapa horretan dauden lau ikaslek zer prestakuntza eta lan esperientzia izan duten azalduko dute, eta nola erabaki zuten LH ikastea edo, zenbait kasutan, nola sortu duten euren enpresa.

Goizeko 11:00etatik aurrera bisitak egingo dira zenbait enpresatara, hala nola Tecnalia, Ingemat, Gestamp, BIC Bizkaia, Gaiker-IK4, Ingeteam, BTEK eta Neiker enpresetara. Ikasle bakoitza bi enpresatan egongo da, nola funtzionatzen duten eta zer behar profesional dituzten bertatik bertara ezagutzeko. «Horrenbestez, enpresa teknologikoetako zenbait lan ingurune ezagutuko dituzte, eta imajinatuko dute etorkizun hurbilean beraiek azaldu beharko dietela beste gazte batzuei zeinen dibertigarria eta zoragarria den euren lan teknologikoa», azaldu dute.

Recibe nuestras newsletters en tu email

Apúntate