El Correo

Azkuna Zentroak Gutun Zuria Letren Nazioarteko Jaialdiaren 10. edizioa antolatuko du

  • Aurten, apirilaren 25etik maiatzaren 1era izango da

Azkuna Zentroak antolatzen duen Bilboko Letren Nazioarteko Jaialdiaren urtemuga da, Gutun Zuriarena. Aurten, hamargarren edizioa izango du apirilaren 25etik maiatzaren 1era literatura-bilera honek, eta idazleek hitza hartuko dute, sorkuntzan eta arlo pertsonalean izandako esperientzietatik abiatuta, gaur egungo jendarteaz hausnarketa egiteko.

Hamar edizio hauetan, ehun idazle baino gehiago etorri dira hitzordu honetara, beren esperientziak ikusleekin partekatzeko. Mundu osoko literaturako erreferentziako idazleak, Nobel sariak ere bai, euskal letretako ordezkariak, eta literatura-arloko kazetariak izan dira gurekin, eta aberastu egin gaituzte beren jardunekin.

Eta hitza ez da izan protagonista bakarra. Musikak, zinemak eta arte eszenikoek ere garrantzi nabarmena izan dute jaialdian, urtero Azkuna Zentroa sorkuntza artistikoaren erdigune bilakatzeko.

Gutun Zuriaren hamargarren edizio honetan, 'Ospakizuna' izango da protagonista, eta inaugurazioa Alberto Manguelen eskutik izango dugu, literaturari egindako gorazarre batez. Ospe handiko izenak izango dira harekin batera: Annie Proulx, Siri Hustvedt, Diamela Eltit, Kirmen Uribe, Jean-Claude Carrière eta Guillermo Arriaga. Literatura ardatz gisa duten adierazpide artistiko desberdinekin jarriko dute harremanetan beren sorkuntzako esperientzia. Aurten, poesiak ere protagonismoa izango du, gure poetarik onenetako batzuek ordezkatuta: Chantal Maillard, Clara Janés, Darío Jaramillo, J.A. González Iglesias eta Beñat Sarasolak errezitaldi poetiko bat eskainiko digute, itxuraz gogoangarria izango den elkarketan. Edizio honetan ere argitalpenen munduak tokia izango du, eta, bertan, Ofelia Grande (Siruela), Manuel Borrás (Pre-Textos), Joan Tarrida (Galaxia Gutenberg) eta Claudio López (Penguin Random House) editoreek katalogo editoriala nola prestatzen den azaldu, eta liburuen edizioaren eta sustapenaren azpian dagoen egitura konplexuaren berri emango digute.

Recibe nuestras newsletters en tu email

Apúntate