El Correo

Zurrumurru arrazisten aurkako kale ekitaldiak izango dira Arabako zenbait udalerritan

Arabako Foru Aldundiak eta CEAR-Euskadi elkarteak hainbat kale ekitaldi sustatu eta antolatuko dituzte ostiralean eta larunbatean Arabako zenbait udalerritan, zurrumurru arrazista eta xenofoboen kontrako "Bizilagunak Araban" estrategiaren barruan eta ekainaren 20an ospatzen den Iheslarien Nazioarteko Egunarekin bat eginez. Jardueren helburua da erakustea arabarrek "ez dutela utziko nahas ditzaten gure artean bizi diren migratzaile eta iheslarien gaineko zurrumurru, gezur eta aurreiritzi xenofoboekin".

Horrela, kaleetan antolatuko diren ekitaldi horien bidez, herritarrek aldarrikatuko dute beharrizan bat dela dagoeneko bertoko hiri eta herrietan bizi diren iheslariekin elkarbizitza eraikitzea. Elkarbizitzaren aldeko mezu horren bidez, herritarrek aldarrikatuko dute "ez dugula utzi behar nahas gaitzaten, eta hautsi egin behar direla xenofobia eraginez hedatzen diren zurrumurru eta gezurren kateak", foru erakundeak jakinarazi duenez.

Jarduerak Arraia-Maeztun hasiko dira, ostiralean, hilaren 16an. Arratsaldeko 16:30etik aurrera, horma irudi handi bat margotuko da "Arraia-Maeztu gara bertan bizi garen pertsona guztiak" goiburuarekin, talde lanean. Kanpezun, 20:30ean, Caminamos para Crecer antzerki taldeak "La zanja" antzezlana eskainiko du: iheslekuen gaineko hainbat historiatan zehar egindako bidaia da, lehen pertsonan kontatua.

Gainerako ekitaldia larunbatean egingo dira, ekainaren 17an. Horrela, Laudioko Aldai plazan, eguerdian, kale antzerkiko emanaldi bat izango da, "Zurrumurruen kontrako agenteak" gaitzat hartuta, eta telebista A Taldearen itxurak eginez, laudiotarren artean dabiltzan gezur xenofoboen kontrako borroka egingo da, jolasean. Amurrion, 18:00etan, Juan de Urrutia plazan photocall bat izango da eta lantegiak egingo dira "Amurrion ez dugu utziko nahas gaitzaten" goiburutzat hartuta.

Azkenik, Gasteizen, zurrumurruen kontrako eragileek bat egin dute Gasteiz Irekia plataformarekin, eta Postetxe plaza artilea eta zapitxoen mataza batean bilduko dute.

Recibe nuestras newsletters en tu email

Apúntate