El Correo

Espainiako Argiztapen Batzordeari harrera Gasteizen

  • Hiria argiteria publikoa modernizatzen ari da, hiriko 38.500 luminarietako 4.500 aldatuz

Gorka Urtaran alkateak Gasteizko Udalak Espainiako Argiztapen Batzordeari egindako harreran hartu du parte. Guillermo Redrado buru duen elkarteko iparraldeko ordezkariak izan dira bileran; taldean ekoizleek, ingeniariek, aholkulariek eta zientzialariek hartzen dute parte. Euskadi, Kantabria, Nafarroa, Errioxa eta Aragoiko ordezkaritzak etorri dira. Argiztapen Batzordea argiaren, ikuspenaren eta argiztapenaren arloan espainiar hizkuntzaren esparruan dagoen ente zientifiko-tekniko garrantzitsuena da.

Alkateak azaldu die Gasteizek urteak daramatzala modernizatzeko ahalegin handia egiten, hiri berde eta adimentsua bihurtzeko asmoz. Hain zuzen ere, argiteria publikoa da jarduera-eremuetako bat, estrategia desberdinen bidez dirua aurreztu eta argi-kutsadura nabarmen murriztu baitaiteke. “Eraginkortasun-neurrien helburua, oro har, argiteria publikoaren elektrizitate kontsumoa murriztea da, led teknologia instalatuz, ohiko lanparak baino eraginkorragoa baita. Lanpara horiek energia-kontsumoa gutxitzea ahalbidetzen dute, eta kaleak hobeto eta modu uniformeagoan argitzea. Gainera, lehengo argiek orain arte eragindako itsutze eta argi-kutsadura desagertuko dira“, azaldu du Gorka Urtaranek.

Azken urteetan hiriko 38.500 luminarietako 4.500 aldatu dira. Estrategia horri jarraitzeko konpromisoa kontuan hartuz, Urtaranen gobernuak aurtengo udal aurrekontuan 425.000 euro jarri ditu argiteria publikoa hobetzeko; aurreko ekitaldian, berriz, 250.000 euro izan ziren. Kontsumoari dagokionez, azken urteetan azpiegituretan egindako berrikuntzek aurrezteko bide eman dute. 2015ean Udalak 3,8 milioi euro ordaindu zituen energiarengatik; 2016an, 3,6 milioira gutxitu zen gastua. 2013an, aldiz, 4,3 milioi ordaintzen zen.

Recibe nuestras newsletters en tu email

Apúntate