El Correo

Luis Aranburu eskolak aurrekontuen aurreproiektua onetsi du, iazkoaren aldean 300.000 euro gehituta

Luis Aranburu musika eskolako zuzendaritza-kontseilua udaletxean bildu da gaur, Estíbaliz Canto zinegotzia buru zela, eta besteak beste aurrekontuen aurreproiektua onetsi du, bai eta 2017an 25. urteurrena ospatzeko jardueren behin-behineko programa ere.

Onetsi den aurreproiektuan 1.779.688,36 euro aurreikusi dira, hau da, 2016koan baino 299.224,85 euro gehiago, 1.480.493,51 euro baitzen.

Izan ere, Gasteizko Udaleko Kultura, Hezkuntza eta Kirol Sailak eskolak kudeatzeko ahalmen handiagoa izan dezan nahi du, eta horregatik ekarpena handitu egin du hainbat kapitulutan, orotara 278.588 euroan, baldin eta Udalaren kontuak ere onesten badira.

Gehitzen den gainerakoa Eusko Jaurlaritzak eskolari egiten dion ekarpena pixkanaka handitu beharrari zor zaio: aurten % 5,20 gehiago jarriko du, 2016an jarritakoaren aldean, eta hiru urtetan gastuaren % 33ra iritsi beharko du, onetsi berri den Udalei buruzko Legean udal musika eskolen finantzaketaz ezarritakoa betetzeko.

Gehitutako dirua langile gehiago kontratatzeko, eraikina autobabes planari egokitzeko zein energia-kontsumoa gutxitzeko, eta 25. urteurrena ospatzeko ekitaldiak ordaintzeko erabiliko da.

Azken horrekin lotuta, zuzendaritza-kontseiluak eskolaren 25. urteurrena ospatzeko jardueren behin-behineko programa onetsi du; aurrerago emango da horien berri.

Azkenik, kontseiluak Enrique Arzamendi Balerdi enpresari esleitu dio pianoak afinatu eta zaintzeko kontratua, 4.125 euroan, prozedura negoziatuan eskaintza aurkeztu zuen bakarra izan baitzen.

Recibe nuestras newsletters en tu email

Apúntate