El Correo

236 profesionalez eta elurra kentzeko 36 makinaz osatutako talde batek erraztuko du neguko zirkulazioa Araban

  • 2016-2017 kanpaina honetan elurra kentzeko makina berri bi izango dira

236 profesional, elurra kentzeko 36 kamioi, denak gatza banatzeko depositudunak, eta 65 traktore hortzdun jardungo dira lanean ibilgailuen zirkulazioa errazteko Errepideen Foru Sareko 1.500 kilometroetan, datozen hilabeteetan izotza eta elurra denean. Kanpaina honetako berritasuna da elurra kentzeko bi kamilioi eta gatza biltzeko bost silo estreinatuko direla.

Foru Gobernu Kontseiluak gaur onartu du 2016-2017 Neguko Bidezaintza Plana. Plan hori azaroaren 15ean jarriko da abian apirilaren 15era arte, 1,2 milioi eurotik 1,5era bitarteko aurrekontuarekin, neguaren gordinatsunaren arabera. Dena den, garai horretatik kanpo izozteak edo elurteak gertatzen badira, foru erakundeak berdin bermatuko du ibilgailuen zirkulazioa, joan den igandean prebentzio programa abian jarri zenean bezala.

Neguko Bidezaintza Planari atxikitako giza taldean 236 profesional ari dira lanean, arduradun, koordinatzaile, gidari eta laguntzaile eta mekanikari: 71 Bide Azpiegituren eta Mugikortasunaren Sailaren plantillakoak dira, beste 76, ordea, urte osoan errepideak zaintzeaz arduratzen diren enpresetako langileak eta beste 88 lurralde historikoko kuadrillek jartzen dituzte.

Beste alde batetik, hona zer baliabide material izango dituen Arabako Foru Aldundiak kanpaina honetan prebentzio eta garbiketa lanetan jarduteko: 36 kamioi elurra kentzeko, gehienak asfaltoaren gainean gatza botatzeko tobera batez hornituak, horietako bi berriak, eta beste kamioi 1 gatzuna zabaltzeko, makina bat gatza kargatzeko, eta 65 traktore elurra kentzeko hortzez hornituak. Horiez gain, beste 8 pick up mendi ibilgailu, hortzdunak, eta 23 laguntza ibilgailu.

Gatza eta gatzuna baliatuko dira errepidean izotza sor ez dadin eta hura arinago urtu dadin. 2.840 tona gatz eta 410.000 litro gatzun biltzeko gaitasuna dago, nabarmen handitu dena silo sarea oraintsu zabaldu denetik Asparreneko industrialdean, Dallok AP-1 autobidearekin duen lotunean eta AP-1 autobideak Lukun duen ordainlekuan.

Prebentzioa eta larrialdiak

Neguko Bidezaintza Plana abiarazteko, Euskalmeten iragarpenei begiratuko zaie; bi lan mota egiten dira: prebentzio aldian, izozteak iragarri direnean edozein kotan edo elurteak 1.000 metrotik behera eta 700 metrotik gora; eta larrialdi egoeran, elurra iragarri denean 700 metrotik behera, loditu nahiz ez.

Giza baliabideak eta baliabide materialak lanean jartzeko, iragarpen horiek ez ezik, arloko profesionalen informazioa eta Aldundiaren hamar estazio metereologikoek ematen duten informazioa ere hartuko da kontuan. Estazio horiek, airearen tenperaturaz, haizearen indarraz eta norakoaz eta prezipitazioez ohiko datuak emateaz gain, beste batzuk ere ematen dituzte, oso baliagarriak, hala nola asfaltoaren tenperatura edo urak, izotzak eta elurrak asfaltoaren gainean duten lodiera.

Herritarrek, bidaian abiatu aurretik, hemen jakin dezakete Arabako errepideen eta mendateen egoera: www.araba.eus, Errepideen Kontrol Zentroaren 945217272 telefonoa eta errepide sarearen informazio panelak.

Recibe nuestras newsletters en tu email

Apúntate