El Correo

Gasteizko Turismo Bulegoa, ONCEren 'Urrezko kriskitina' sarirako hautagaien artean

  • Travel For All agentzia espezializatuak eta Matia fundazioak garatu dute Tourism4All izeneko proiektua

Gasteizko Turismo Bulegoa ONCEren tokiko ordezkaritzak antolatutako “Urrezko Kriskitina, 2016″ sarirako hautagaien artean dago. Horren bidez, ONCEk Gasteizko Udalak turismo irisgarriaren arloan egindako ahalegina aitortu nahi du, besteak beste, Tourism4All europar proiektuan parte hartu baitu; turismo inklusiboari dagokionez Euskadi erreferentziazko helmuga gisa merkaturatzea da proiektu horren helburua.

Travel For All agentzia espezializatuak eta Matia fundazioak garatu dute Tourism4All izeneko proiektua, eta horren bitartez, Gasteizek, Eusko Jaurlaritzarekin eta Euskadiko helmuga nagusiekin batera (Bilbo, Donostia, Zarautz, Goierri eta Arabako Errioxa) irisgarritasun irizpideak sustatzen ditu ekipamendu turistikoetan, sektoreko profesionalen prestakuntza eta gaitasunak hobetuz dibertsitate funtzionala duten pertsonentzako arretaren alorrean, turismo pakete egokituak sortuz, eta promozio eta merkaturatze ekintza bereziak diseinatuz. Duela gutxi aurkeztu ziren Gasteizen proiektuaren barruko ekintza turistikoak eta ibilbide inklusiboak biltzen dituzten katalogoa eta bideoa.

“Turismo Bulegoa “Urrezko Kriskitina” jasotzeko hautagai izatea da turismo inklusiboaren alorrean egiten ari garen lanaren aitorpen onena, eskaintzaren hartzaileek berek sustatu dutelako hori. Irisgarritasun unibertsalean oinarritutako turismo eredu baten alde lan gehiago eta hobea egitera animatzen gaitu”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Herritarren lineako bozketaren bidez erabakiko da 2016ko Urrezko Kriskitinaren irabazlea zein den, eta datorren urriaren 22an emango da, XXI. Kriskitin Lasterketa egiten den egunean. Urriaren 20ko 12.00etan bukatuko da botoak jasotzeko epea.

Recibe nuestras newsletters en tu email

Apúntate